Call Options kalphung

Thuhmahruai

Options hmanga inremsiamna (contract) lei leh hralh hian Indian Derivatives market-ah hian hmun pawimawh leh zau tak a luah a. Derivatives hmang a inremsiamna bikah hian options hian 80% a chang ti ila kan sawi sual awm lo ve, a bak 20% hi Futures hmanga inremsiamna a ni ve thung ang. Khawvela financial market dang kan thlir chuan Options hi a awmna alo rei ve ta a, thil a lo nih tawh dan han en thuak thuak ila -

A inremsiam tute duh dan kalphunga siam Options (Custom) chu Over the Counter (OTC) kan tih hian kum 1920s chho aṭang khan a lo awm tawh a. Heng options-te hi commodities (Gold, Silver, Thlai, Oil, adt.) in lei sak leh hralh tawn sakna atana inremsiamna a ni tlangpui.
Equity-a Options hmanga inremsiamna hi Chicago Board Options Exchange (CBOE)-ah kum 1972 khan an lo trade ṭan bawk.
Currency (ram pawisa) leh bonds kan tih Options hmanga inremsiamna hi 1970s tawp lamah a awm ṭan ve thung a, heng hi Over the Counter (OTC) hmang a trade ṭhin a ni.
Philadelphia Stock Exchange-ah kum 1982 atang khan exchange kaltlanga Options trade hi an lo intihhmuh ṭan bawk.
Kum 1985 CME-ah interest rate options an lo trade ṭan bawk.

Derivatives: Mi pahnih inkara inremsiamna emaw intiamkamna (contract), hlutna nei thei, a hlutna chu an inremsiamna Asset (thil hlutna nei) behchhan a tehchhuah.

Options: Derivatives hrang hrang zinga pakhat.

Over the Counter: Exchange kaltlang ni lo va mi hrang/pawl pahnih inkara inremsiamna.

OTC chauha trading a kal lai aṭang hian nasa takin hmasawnna kan hmu tih a chiang awm e. India ramah erawh, options hi hman ṭan a lo nih aṭangin Exchange kaltlanga lei leh hralh hi kalpui a ni thung. Exchange kaltlang lo va options trading 'Badla' system an tih pawh a lo awm ve tho bawk, heng hi sorkar venhimna leh enpuina huam chhung a ni lo tih hriatthiam a pawimawh awm e. Tunlaiah chuan Badla system hi a awm tawh lo a ni. India rama Derivative market chanchin tlangpui -

June 12th 2000 - Index Futures hman ṭan a ni.
June 4th 2001 - Index Options hman ṭan a ni.
July 2nd 2001 - Stock Options hman ṭan a ni.
November 9th 2001 - Stock mal futures hman ṭan a ni.

Options market hi 2001 aṭang khan India ramah lo awm tawh mah se a hmangtu an tam tak tak kum chu 2006 chauh kha a la ni! Chung hun lai chuan lei tum leh hralh tum ten an chhanna man zat inkar (spread) pawh a la zau viau a ni. Amaherawh chu, kum 2006-ah khan Ambani-te unau sumdawnna chu ṭhen darhin a awm ta a, anmahni company ṭheuh an enkawl takah chuan, leitu leh hralhtu emaw market participants emaw te chu an rawn pun belh phah ta em em a ni. Heti chung pawh hian, stock mal bik options leitu leh hralhtute tamlam en chuan, ram dang market kan phak lohna ala sang hle thung a ni.

Inremsiamna dangdai

Options-ah hian chi hnih a awma, chungte chu Call option leh Put option-te an ni. Heng options-te leitu emaw hralhtu emaw i ni ve ve thei. Chung options leitu emaw hralhtu emaw i nihna chuan i hlawkna leh channa a awm theih dan tur thui takin a hril ang. Tunah chuan Call Options nih phung i zir hmasa phawt mai teh ang. A zir dan awlsam ber leh hriatthiam a awlsam dan ber chu a tak ngei a kan hriatthiam theih tur thil thleng hmanga entirna pek hian a ni.

Ti hian suangtuahna lo nei ta la; ṭhian dun pahnih, Sanga leh Mawia an awm a. Sanga chuan acre 1-a zau Mawia ram lei tum chuan hun ṭha a zawng nasa hle a. Chu ram acre 1 a zau hlut zawng chu ₹5,00,000 (nuai nga) anga chhut a ni. Sanga'n hetia Mawia ram lei tuma a hel vel chhan chu Mawia ram bul hnaiah hian hun lo la thleng tur thla 6 chhungin kawngpui (highway) siam a ni dawn tih sawi thawm a hriat vang a ni. Kawngpui (highway) chu siam a lo nih hlauh chuan, tuna Mawia ram chu nasa takin a hlutna a sang chho dawn, a tlawm laia lo lei a, sum peipun nan a hman chu a tum ta a ni. Amaherawh chu, kawngpui siam a nih tur thu Sanga'n a hriat chu thu belhchian dawl lo ni ta se, kawngpui chu siam ni dawn lo ta se, Sanga chuan Mawia ram chu a lei thlawn kan ti thei awm e.

Kawngpui siam project chu thu belhchian dawl lo ni ta reng se, a talbuai tur chu Sanga a ni a, amah pawhin a hria a, a lei dawn nge lei dawn lo tih a inzawt ve nasa hle awm e. Chutia rilru siam hleithei lo va a awm lai chuan, Mawia ve thung chuan Sanga'n a lei duh a nih phawt chuan hralh a lo inring ru viau thung.

Sanga chuan ama tana him zawka thil kalpui chu a ṭha in a hre ta a, Mawia hnenah chuan inremna dangdai tak, lehlam lehlam tana hamṭhatna awm inremsiamna neihpuiah chuan a sawm ta a. Chu inremsiamnaah chuan -

Vawiinah Sanga chuan ₹1,00,000 (nuai 1) Mawia chu a lo pe lawk ang. He sum hlawm Sanga'n Mawia a pek hi a dil let thei tawh lo vang a, Mawia hian vawiinah he sum hi Sanga aṭang a la a nih chuan, thla 6 hnuah Sanga'n a ram a lei duh a nih chuan a lo hnar thei bik lo ang. A awmziaah chuan he sum hi inremsiamna a awm ngei tih lantirtu sum a ni. Premium tiin kan sawi bawk.
Chutiang a Mawia'n ₹1,00,000 a lo lak takah chuan, thla ruk hnuah Sanga'n a ram chu a lei duh a nih chuan a hralh ngei ngei tur a ni thung ang. Mawia hian ₹1,00,000 alak avang hian obligation a nei tihna a ni.
Thla ruk hnua ram man turah chuan vawiinah Sanga leh Mawia te chu an lo inrem lawk a, ₹5,00,000/- (nuai nga) ah inremna an nei a. Thla ruk hnua ram an inlei sak theihna man tura an inremna hi strike price kan ti.
Sanga'n sum pek lawk a neih avang leh lungawi taka Mawia'n alo lak sak avangin, thla ruk hnuah Sanga chuan Mawia ram chu a lei leh duh lo a nih chuan a lei lo thei a, amaherawh chu Sanga'n a lei duh a nih chuan Mawia hian Sanga hnenah a lo hralh ngei ngei tur a ni thung.
Sanga chuan thla ruk hnuah chuan lei leh duh lo ta sela, Mawia hnena ₹1,00,000 a lo pek hmasak kha a la let thei lo thung ang.

He inremna danglam tak hi eng nge i ngaih ve dan le? He inremsiamnaah hian a tu chu nge fing zawk, Sanga hian inremna dangdai tak a ngaihtuah chhuah avangin a fing zawk em ni? Nge ni a, Mawia hian chu inremna chu a lo pawm avangin fing zawk chan a chang? He zawhna hi thil awm dan uluk taka i zirchian hmasak loh chuan chhan nghal ngawt a harsa ang. Chuvangin, i lo chhiar takte leh i la chhiar zel tur hi ngun deuh va chhiar a, a ṭul anih chuan chhiar nawn leh thin turin ka chah duh che a, i chhiar mek hi a pawimawh hle in, Options ṭobul leh kalphung bulpui a ni tih hriat a ṭha awm e. Kan sawi laiah let leh ila, Sanga chuan fing takin inremna a siam pui a ni. He inremsiamna hian nihphung hrang hrang a nei tel bawk.

Sanga'n inremsiamna a pharh chu han zirchiang ta ila -

Inremsiamna neih man (agreement fee/premium) ₹1,00,000 chu Sanga chuan Mawia hnenah pe lawkin, Mawia chu intiamkamnaah a phuar lut a ni. Hei hian Mawia ram chu Sanga lei theih tur chauh in thla ruk chhung chu a siam dawn a ni.
Sanga chuan vawiina Mawia ram hlutna (₹5,00,00) man zatin thla ruk hnu a lei leh thei turin Mawia chu inremna a ziah pui bawk. Thla ruk hnuah Mawia ram hlutna chu a engtizat pawhin sang chho emaw tla hniam emaw pawh ni se, ₹5,00,000 in a duh chuan Sanga chuan a lei thei ang. Hetah hian, ₹5,00,000 bakah ₹1,00,000 agreement fee kan tiha kha a la awm bawk tih hriat a ṭha awm e.
Thla ruk a ral hunah, Sanga hian ram chu a lei leh duh lem lo a nih chuan, Mawia tang chuan a lei lo thei a, amaherawh chu, Mawia ve thung chuan inremna man (agreement fee) Sanga atang alo lak tawh avangin, Sanga hian a lei duh a nih chuan a hralh ngei ngei a ngai thung.
He intiamkamna man emaw inremsiamna man (agreement fee) hi a inpek let leh theih loh bawk a, Sanga leh Mawia hian an zah tawn tur a ni bawk.

Chutiang inremsiamnaa an luh takah chuan, Sanga leh Mawia te chuan thla ruk chu an nghah chhuah a lo ngai ta a. Vawiina Mawia ram hlutna chu, kawngpui siam a nih leh nihlohah a innghat hle tih a chiang awm e. Amaherawh chu, chu kawngpui sak a nih leh nih loh chu, a eng zawk pawh lo thleng ta se la, thil chiang tak thleng thei pathum a awm ta a ni -

Kawngpui chu siam a ni dawn a, ram hlutna chu namen lo vin a sang chho a, entir nan ₹10,00,000/- ah a sang chho a.
Kawngpui chu hmun dang zawkah siam a ni dawn tih an rawn nemnghet a, mipui an lawm lo va, a chhehvel a ram man zawng zawng chu a tlahniam a, kan sawi mek Mawia ram man pawh chu ₹3,00,000 (nuai thum) ah a tla hniam ve ta a.
Engmah thil thleng a awm lo va, Sanga'n kawngpui siam a ni dawn tih sawi a hriat kha thubelh chian dawl lo a lo ni a. Ram man pawh a inthlak ta lova, ₹5,00,000/- ah a awm nghet a.

Heng thil thleng thei pathumte bak hi thleng thei dang a awm meuh lo.

Tuna Sanga dinhmunah hian inchan in, a chung a thil thleng thei kan sawiah te hian eng nge a tih ang tih i ngaihtuah chhunzawm ang.

Thil thleng thei 1-na: Ram man ₹10,00,000-ah a sang chho

Kawngpui chu siam a lo nih a, Sanga beiseina anga thil a kal tak avangin, ram hlutna pawh chu namen lovin a sang chho ve ta a. Sanga leh Mawia te inremsiamna ang kha chuan, Sanga hian a duh a nih chuan thla ruk hnuah Mawia ram kha a lei lo thei a nih kha. Amaherawh chu, ram hlutna alo san takah chuan, Sanga chuan Mawia ram chu a lei loh i ring em? A rin awm lemloh a ni, a chhan chu Sanga hian chan tha a chang tawh tlat a ni -

Vawiin ram man hlutna = ₹10,00,000

Thla ruk kalta a, Mawia'n Sanga hnena hralh a phalna, an inremtiamna man zat = ₹5,00,000

A awmzia chu, tunah tak hian Sanga hian ₹5,00,000 a Mawia ram chu lei theihna a nei a, chu chu lei ta se la, Sanga chuan vawiina ram man ₹10,00,000 vekin midang emaw a lei duh dang hnenah emaw a hralh leh nghal thei tihna a ni. Chiang takin heta hlawk zawk chu Sanga a ni awm e. Sanga hian Mawia hnen aṭang ram hi a lei lohna chhan tur pakhat mah a awm ta lo va, Mawia pawh hian thla ruk liamta khan Sanga hnen aṭang ₹1,00,000 (intiamkamna sum/premium) a lo lak tawh avangin vawiina ram man aia tlawma Sanga hnenah a hralh ngei ngei a lo ngai ta bawk a ni.

Anih chuan, Sanga chuan engzat nge hlep emaw hlawkna emaw a neih tak? Hetiang hian chhut tur a ni -

Ram leina man = ₹5,00,000

Intiamkamna sum = ₹1,00,000 (inpek let theih loh kan tih, Mawia'n Sanga hnen atanga a dawn kha)

Sanga sum sen belhkhawm = ₹(5,00,000 + 1,00,000) = ₹6,00,000

Vawiina ram hlutna = ₹10,00,000

Sanga hlep emaw hlawk dan zat = ₹10,00,000 - ₹6,00,000 = ₹4,00,000

Heti pawh hian a sawi theih awm e - ₹1,00,000 sumlu chauh hmangin, Sanga chuan a sumlu hman let li hlawkna a siam a ni! Mawia hian a ram hlutna chu a sang chho tawh a ni tih hre mah se, Sanga hnenah vawiina ram man aia tlawm zawk a intiamkamna a lo neih tawh avangin, a hralh ngei ngei a ngai ta bawk a, Sanga hlep zat chiah chiah chu Mawia chan zat a lo ve thung dawn a ni.

Thil thleng thei 2-na: Ram hlutna ₹3,00,000-ah a tla

Kawngpui siam chu a thleng ngei dawn a, amaherawh chu hmun dangah zawk siam a nih dawn avangin, a chhehvel a ram neite lawm lo chuan, an ram chu an hralh ta chur chur mai a, chu chuan ram man pawh a rawn tih tlawm phah ta hle a, ₹3,00,000 ah Mawia ram pawh chu a lo awm ve ta a.

He dinhmunah hian Sanga hian eng nge a tih ang? Chiang takin, ram chu a tan lei a sawt tawh lo tih a lang a, chuvang chuan an inremsiamna a sut leh theih avang chuan, sut mai chu a tihtur a ni awm e. Sanga tana Mawia ram lei a hlawk tawh lohna chhan chu heti pawh hian a sawifiah theih awm e -

Sanga'n Mawia hnen atanga ram a lei theihna man zat, a inremna zat kha ₹5,00,000 a nih kha. Sanga hian lei Mawia ram chu lei tur ni ta sela, an inremna zat ₹5,00,000 (vawiina ram hlutna aia sang daih) a, a lei a ngaih piah lamah, ₹1,00,000 (intiamkamna man) Mawia hnenah alo pe tawh a nih kha. A vai a lak chuan, ₹6,00,000 Sanga hian he ram lei nan hian a sen a lo ngai dawn a, ram hlutna alo tlahniam tawh bawk nen, Sanga tan Mawia ram lei chu hlawkna pakhat mah a awm ta lo a ni. An lo inrem tawh ang in, Sanga chuan Mawia hnena a pek ₹1,00,000 chu a la let thei tawh lo a, cheng nuai khat chu Mawia hlawkna tur a lo ni ta a, Sanga chuan Mawia hlawkna zat chu a chan ve thung ta a ni.

Thil thleng thei 3-na: Ram hlutna a danglam lo, ₹5,00,000-ah a awm.

Kawngpui siam a nih tur thu Sanga'n a hriat chu thuleng vel mai mai, belhchian dawl lo a ni a, ram man pawh chu a danglam ta lo va. Hetiang anih avang hian ram man pawh thla ruk kal ta a, a hlutna ngaiah chuan a la awm chhunzawm a. Sanga'n ram a lei tumna chhan ber kawngpui chu thu belhchian dawl lo a nih tak avangin, ram chu a tan lei a sawt ta lo. A chhiarkawp ang zawng a, a hlawklohna chhan chu -

Ram hlutna = ₹5,00,000

Intiamkamna man = ₹1,00,000

Belhkhawm = ₹6,00,000

Vawiin a ram hlutna zat = ₹5,00,000

Chiang takin ₹6,00,000 senga ram lei hi Sanga tan hlawkna pakhat a awm lo a ni. Sanga hian ₹1,00,000 (lak let theih loh) Mawia hnenah a lo pek tawh avangin heti zat hi a chan dawn tihna a ni a, heta hlawkna teltu chu Mawia a nih leh dawn tihna a ni.

Entirna ka sawi hi i hrethiam a nih chuan a lawmawm hle a, Call Option kalphung i hrethiam ṭan tawh tihna a ni! Amaherawh chu, stock market emaw Options emaw luhchilh nan chuan hriattur a la tam deuh va, hmanhmawh lo ila.

Heng zawhna leh chhanna hmang hian hriatthiam lehzual i han tum teh ang -

Ram hlutna kha a tlahniam dawn emaw a inthlak dawn lo emaw pawh ni se, eng vangin nge Sanga khan ₹1,00,000 kha chan a huam nachhan?
Sanga khan ₹1,00,000 a chan ngei ang, amaherawh chu, a chan zat tur (nuai 1) hi a hrelawk a, nuai 1 bak hi a chan belh dawn loh tih a hre bawk. Hemi piah lamah hian, ram hlutna a sang chho a nih chuan, hlep a nei dawn tih a hre bawk a, ram hlut hi ₹10 Lakhs-ah a chhoh chuan a sumlu a hman aṭanga lak 400% hlep (4 Lakhs) a nei dawn a ni.
Eng ang dinhmunah nge Sanga hian hlawkna a hmuh ang?
Ram hlutna man a san chauhin hlawkna a nei thei ang.
Eng ang dinhmunah nge Mawia ve thung hian hlawkna a neih theih ang?
Ram hlutna a inthlak loh emaw ram hlutna a tlakhniam emaw chauhin hlawkna a nei thung ang.
Thla 6 a liam hnuah ram hlutna sang chho vak ta se, Mawia hian a chan ṭeuh dawn si a. Mawia hian thil chiang lo leh sum chan teuh theihna hi la ngam nge a nih?
Chik takin han chhut ta la. Thil thleng thei pathum chauh a awm kan tih tawh kha, chung thil thleng thei pathum aṭanga pahnih chu Mawia hlawk theihna a ni. Statistics thlirna aṭang chuan, Mawia hian 66.66% hlawkna a neih theihna 'chance' a nei a, Sanga ve thung chuan 33.33% chauh hlawkna neih theihna 'chance' a nei thung.

Heti hian kan entirna pek hi han khaikhawm ta ila -

Mawia'n intiamkamna sum Sanga hnen aṭanga a dawn khan Sanga'n a duh a nih chuan ram lei theihna thuneihna a neih tir a, tin, Mawia ve thung chuan Sanga aṭanga sum a dawn chu a kawl tlat thei thung a, amaherawh chu, Sanga'n ram a lei duh a nih chuan, a intiam ang ngei in, Sanga hnenah a hralh ngei ngei a ngai thung.

Thla ruk hnu a he inremsiamna awmzia neih tir tu chu ram hlutna a ni. Ram tel lo vin, he inremsiamna hian awmzia a nei thei lo.

Chuvang chuan ram chu Underlying (awmzia neih tir tu thil hlutna nei - asset) chu alo ni ta a, an inremsiamna chu Derivative (Underlying atanga hlutna tehchhuah theih thil) chu alo ni ta a ni.

Sanga leh Mawia inremsiamna ang hi Options hmanga intiamkamna/inremsiamna, "Options Agreement" kan tih chu a lo ni ta bawk a.

Mawia chuan intiamkamna tinungtu sum Sanga hnen aṭang a lo dawn lawk avang chuan Mawia chu inremsiamna zuartu emaw 'agreement seller or writer' a lo ni ta a, Sanga chu inremsiamna leitu emaw 'agreement buyer' a lo ni ta bawk a ni.

He intiamkamna emaw inremsiamna emaw a lut dun tur hian ₹1,00,000 an inpe hmasa a, he nuai 1 hi an inremsiamna man emaw hlutna emaw chu alo ni ta a, hei hi 'Premium' kan ti thin.

Ram zau zawng, ram man leh an in lei leh hralh hun tur pawh inremsiamnaah hian a tel bawk.

A kalphung pangngaiah chuan, Options hmanga inremsiamna a awm hian, inremsiamna leitu hian an inremsiamna thil lei emaw hralh emaw anih chungchangah thuneihna a nei a, inremsiamna hralhtu ve thung chuan inremsiamna leitu duhdan tihhlawhtlin a ba thung.

Entirna ka pek hi ngun taka zir turin ka chah duh che a. A tul anih chuan i lo chhiar nawn leh fo dawn nia. He entirna hi kan hmang nawnin, kan ring nawn fo dawn a ni.

He entirna kan pek hi, a stock market hawi zawnga thlir nan hman i lo tum chhin tawh ang le.

Call Option chu

A chunga entirna kan pek hmang khian stock market-a call option kalphung hriatthiam i han tum teh ang le.

Tehkhinthu ah, vawiinah hian stock pakhat ABC man chu ₹67 lo ni ta sela. Chu stock chu thla khat a liam hunah ₹75 aia sang a nih chuan ₹75 a lei theihna thuneihna nei ta la i duh ang em? I duh dawn chiang a ni, thla khat hnuah chuan ₹85 pawh lo ni ta sela, ₹75 tho in i lei thei dawn a!

Hetiang a lei theihna thuneihna nei tur hian vawiinah sum i pek lawk a ngai thung a, entir nan ₹5. Stock ABC man chu ₹75 aia sangah chho ta sela, ₹75 man a i lei theihna dan chu i hman ngei ang a, ₹75 chuan hlim takin i lei ang. Amaherawh chu, thla 1 a liam hunah ₹75 aia hniamah stock man chu awm ta sela, ₹75 mana i lei theihna dan emaw thu emaw chu i hman kher a rinawm loh va, hetiang a nih chuan a tira i pek lawk ₹5 chiah kha i chan dawn tihna a ni. Hetiang ang intiamkamna emaw inremsiamna ang hi Option Contract kan tih chu a ni a, a bik takin tuna ka rawn sawi hi 'Call Option' kan ti deuh bik a ni.

Call Option hmanga inremsiamnaa i luh hian, thil thleng thei pathum a awm a. Chungte chu-

Stock man a chho a, entirnan ₹85/- ah.
Stock man a tla a, entirnan ₹65/- ah.
Stock man a chesawn lo va, ₹75/-ah ala awm a.

Thil thleng thei 1-na: Stock man chu a chho a nih chuan, ₹75/- man a i lei theihna thu emaw dan emaw hman chu i tan a hlawk a.

I hlawk/chan zat tur chu hetiang hian a ni -

Stock i leina man = ₹75

Intiamkamna man (Premium) i pek = ₹5

Stock lei nana i hman belhkhawm (Expense) = ₹80

Tuna stock man = ₹85

I hlawkna zat = ₹85 - ₹80 = ₹5/-

Thil thleng thei 2-na: Stock man chu ₹65/- ah tla ta sela, nangin a ₹75-a i lei theihna dan i hman ngawt khan awmzia a nei lo va, lei tur ni ta la, ₹65 mana awm stock chu ₹80 (75+5) sengin i lei dawn tihna a ni, a hlawk lo hle a ni. Chuvangin, a tira ₹5/- i pek chiah chan (loss) kha a finthlak zawk a ni.

Thil thleng thei 3-na: Stock man chu inthlak danglam lovin ₹75 ah awm ta sela, ₹80 tho senga ₹75 mana stock lei ngawt khan awmzia a nei thui lo va, ₹75 a i lei theihna dan pawh hmanin awmzia a nei ta lo a ni.

A kalphung hi a mawlmangin hriatthiam loh tur a awm lo a ni. A kalphung hi i hriatthiam chuan Call Option nihphung i hrethiam tawh tihna a ni mai. Thil hriatthiam leh zir belh tur chu a la awm teh meuh mai, amaherawh chu a tlanglawn chu i hrethiam ta.

Kan lo sawi tawh chin aṭanga lo lang chiang chu, stock man a sang chho dawna rinna emaw hriatna emaw i nei a nih chuan Call Option lei hian awmzia a nei tih hi a ni awm e.

Sanga leh Mawia te hmanga entirna kan pek leh Stock hmanga entirna kan pek hi i han sawi zawm ta ila.

Thumal pawimawh	Sanga-Mawia hmanga entirna	Stock hmanga entirna	Thubelh
Underlying	Acre 1 a zau ram	Stock	Ram tehkhinthuah khan acre 1 a zau tih a ni a. Stock options ah ve thung chuan stock tam lam sawi nan Lot Size hman a ni ang.
Expiry	Thla ruk	Thla khat	Futures kalphung ang bawkin expiry pathum a awm thin.
Reference Price	₹5,00,000	₹75	Strike Price tia sawi thin a ni bawk.
Premium	₹1,00,000	₹5	Stock market-ah chuan, premium man hi a inthlak reng tih hriat a ṭha.
Regulator	Mimal inkara inrintawnna	Stock Exchange	Options-a intiamkamna zawng zawng hi sum (cash) hmanga tihhlawhtlin (settlement) vek a ni a, inpek duh loh emaw intiamkamna zawm duh loh emaw ala awm lo.

A tawpah chuan, heti hian Call Options contract chu kan sawifiah thei awm e -

"Call Option leitu (buyer) chuan a duh a nih phawt chuan, asset emaw commodity emaw (underlying) chu vawiin emaw tun huna an inremtawnna man (strike price) zatin, hun (expiry date) eng emaw chen a ral hunah, call option hralhtu (seller) aṭang chuan a lei theiin, a duh chuan a lei lo thei bawk. Hetiang a nih rual hian, call option leitu chuan a thuneihna hi a rawn hmang a underlying chu a lei duh a nih chuan, call option lo hralhtu (seller) chuan underlying chu a lo hralh ngei ngei a ngai a, a hnar thei lo thung. Call option leitu (buyer) in hetianga thu a neih theihnan a inremsiam lai la la in, call option zuartu (seller) hnenah intiamkamnaa luh man (premium) a pek a ngai thung".

He zirlai aṭanga kan zir chhuah te

Options hi Indian market-ah kum 20 chuang chu a lo awm tawh, amaherawh chu leitu leh hralhtu an rawn tam ṭan kum chu 2006 aṭang chauh khan a ni.
Option hi i peipun mek (investment) venna leh thil chiang lo laka kan invenna tur hmanrua a ni.
Call option leitu hian asset lei theihna dan a nei a, call option hralhtu erawh chuan asset hralh a intiamna tih hlawhtlin tur a nei thung.
Asset lei theihna dan hi call option leitu hnenah chiah pek a ni a, a duh chuan a lei lo thei bawk.
Option zuartu emaw hralhtu (Options Seller) hi Option Writer tiin kan sawi thin bawk.
Option leitu leh hralhtu ten inremsiamna an neih hian, a leitu chuan 'premium' a zuartu (seller) hnenah a pek a ngai ṭhin.
Hetiang ang inremsiamna emaw intiamkamna emaw thleng tur chuan, an inremtawnna man (pre-specified price) - strike price an neih a ngai ṭhin.
Call options leitu hlawk theih dan chu asset emaw underlying emaw man strike price aia a san chhoh chauhin a ni.
Asset emaw underlying emaw man chu an inremna man - strike price aia tlawmah emaw a zat chiah chiah ah awm ta sela, call options leitu (buyer) chuan hlawkna a nei thei lo.
Statistics leh chhiarkawp thlirna aṭang chuan, options seller hian hlawk theihna dinhmun a nei ṭha zawk zel ang.
Options buyer tan chuan, underlying asset a lo la hlut zel theih dan tur chu uluk taka chhut chian a ṭul a ni.

Support Robawm: