Skip to content

Technical Analysis thubul

Zirlai hmasa lamah khan technical analysis kan khuhhawng a, fundamental analysis nena an danglamna pawh kan sawi a nih kha. He zirlaiah ve thung hi chuan technical analysis innghahna thubul (principles) pawimawh tak tak kan zir ho dawn a ni.

Asset hrang hrangah a hman theih

Market zirchianna hmanrua dangte aia technical analysis chungnun zawkna emaw, a ṭhat bikna chu eng asset-ah pawh a hman theihna lai hi a ni awm e. Asset-in historical time series data kan tih (chu chu hun kal tawha man a lo nei tawh dan) a neih phawt chuan technical analysis hi a hman theih vek a ni. Time series data-ah chuan hun kal tawha asset Open (eng emaw hun chhunga a inhawnna man), High (eng emaw hun chhunga a man san lai ber), Low (eng emaw hun chhunga a man tlawm lai ber), Close (eng emaw hun chhunga a inkharna man), Volume (eng emaw hun chhunga asset trade-tu tamlam) leh adt. a tel a ni.

Tehkhin thu han hmang leh ta ila. Lirthei (car) khalh zirah inngai ta la. Car khalh i zira i thiam tawh chuan eng car pawh i khalh thei vek tawh ang, XUV emaw Alto emaw pawh nise. Chutiang chiah chuan technical analysis pawh hi vawi khat i zir hi a tawk mai a, i zirchhuah chu asset hrang hrang - stocks, commodities, forex, fixed income leh adt. ah i hmang nghal vek thei a ni.

Asset pakhat aia tam, asset hrang hranga technical analysis hman theih a nihna lai hi market zirchianna thiam thil dang aia a ṭhatna leh chungnunna chu a ni awm e. Entir nan, fundamental analysis hmanga stock zirchiang tur chuan company profit and loss statement, balance sheet leh an cashflow statement-te i zir a ngai a. Commodities-ah fundamental analysis han hmang ve dawn ta la, i zir tur thil chu a dang leh daih thung a ni.

Thlai leh lo (agriculture) commodity coffee emaw hmarcha emaw, fundamental analysis-ah chuan ruah tlak dan, lo neih hun leh thlai chin dan te, demand, supply leh inventory management-te a ni leh daih thung. Chutiang chiah chuan metal commodity fundamental a dang a, energy commodity fundamental a dang leh bawk.

I asset invest/trade tur a zirin fundamental analysis hman dan tur a danglam lai hian technical analysis ve thung eng asset-ah pawh a ngai reng a ni. Entir nan, Moving Average leh RSI hi equity, commodity emaw currency-ah a hman dan a inang vek a ni.

Technical Analysis thubul

Fundamental analysis ang lo takin, technical analysis chuan company chhungril hlutna a ngai pawimawh ve lem lo va. Technical analysis chuan hun kal tawha stock lo chet tawh dan leh a telte tam dan leh ṭhahnem ngaih dan chiah a ngai pawimawh a, hemi hmang hian stock man chu a kal leh zel dan tur chu zirchian leh ngaihruat ṭhin a lo ni ta a ni.

Technical analysis hian inghahna thubul pawimawh tak tak a nei a, a nihna anga hmang chhuak tur chuan hengte hi bel taka hriatthiam a pawimawh hle:

  1. Stock manah engkim a lang chhuak tawh - Mipui vantlangin kan hriat tawh leh la hriat chiah loh thil hi stock man thar berah chuan a rawn lang chhuak tawh. Entir nan, company pakhata an hotu deuh chuan an company-in tun hnaiah hlawkna ṭha zawk a nei dawn tih a hriat lawk avangin, an company share chu a lo lei lawk a. A rukin ti mah se a chet dan chu stock manah a rawn lang lo thei lo va, hei hi technical analysis hmanga lo zirchiangte chuan lo hmu in, chu stock man chu a chho hnai dawn tiin an lo intintuah thei ta a ni.

  2. Thil thlen chhan aiin a thlen dan a pawimawh - Technical analysis chuan thil thlen chhan zirchian a tum lem lo va. Engvanga company-a an hotu chuan share lei ṭeuh nge? tih lam kha a ngaihven lem lo. Technical analysis chuan share an lei ṭeuh avanga stock man lo chet dan kha a ngai pawimawh zawk a ni.

  3. Stock man kal dan hian awn lam (trend) a nei a ni - Pui tham tak taka market a lo chet tawh dan hi i zirchian chuan, awn lam a lo neih sa vang a ni tlangpui ang. Entir nan, June 2023 aṭanga September 2024 thleng khan NIFTY chuan chawlh mumal neih miah lo vin a chho char char anih kha. Hei hi zan khata thil thleng ni lo vin, June 2023 a nih hma aṭang tawha Nifty hian chho lama kal tura a lo awn sa tawh vang a ni. Market emaw, stock hian awn lam a nei chiang tawh a nih chuan, a awnna lamah chuan a kal mai ṭhin a, a awnna lam a thlak leh te a nih ngawt loh chuan a awnna lo lam, a ep zawng hian a kal mawh hle bawk. Entir nan, stock ABC chuan chhoh lam a awn a, hun a kal deuhva, a awnna lam - chho lamah chuan a kal nghet tial tial a, a awnna lam a chian tak avang chuan chho lam panin hun rei tak a kal char char thei a ni.

  4. Thil thleng tawh hi a thlen nawn leh ṭhin - Technical analysis thlirnaah chuan, thil thleng tawh hi a thleng nawn leh fo ṭhin. Market hian bullish trend (chho turin a awn tih sawina) lo nei ṭhin tawh sela, ṭum dangah pawh a chho leh fo ṭhin a ni. Hei hi a thlenna chhan nia lang chu, market-a telte hian thil ngai tho tih nawn kan chin vang a ni. Market chho lama awn, chho vung ṭha laiah chuan market-a telte chu an duhamin, to viau tawh pawh ni sela, a aia to vin an ngam zel a ni. Hei hian market chu a nawr chho chhunzawm zel ṭhin a. Chutiang bawkin market hian chhuk lam awn ta sela, market-a telte chu hlauthawngin market a tlawm viau tawh chung pawhin an hralh chhunzawm char char a, market chu chhuk lamah an nawr tla char char ṭhin a ni. Market-a telte hi mihring tho kan a, thil tih nawn kan chin em avangin thil lo thleng tawh leh kan paltlang tawh pawh hi kan thlen nawn tir fo ṭhin a ni.

Trade thleng dan khaikhawmna

India stock market hi zing dar 9:15-ah a inhawng ṭan a, CAS hman a nih hnuah tlai dar 4pm-ah a inkhar kim ṭhin. A inhawn aṭanga a inkhar thleng hian market-a telte inkarah trade a thleng hnem hle a. Stock hi a mal pawhin ngaihtuah la, minit tina trade thleng hi a awm ziah a ni. Market-a tel ve ta chu engtin nge trade thleng leh stock man inthlak reng dan chu kan zui ve theih eng?

Tehkhin thu in hetiang hian kan zirchiang dawn a ni, stock pakhat ABC-ah hian trade tam tak thlengah ngai ta la. A hnuaia thlalak kan dah hi en bawk la. Thlalaka point te reuh te te hian eng emaw hunlaia trade thleng a entir a. Second khat zela trade thlen dan thai lan theih nise chu a hnawk viau awm e. A felfai zawk nan darkar khat dana trade thleng hmangin entir na pe ta ila -

daily trade pattern

Market chu 9:15am-ah a inhawng a, dar 4:00pm-ah a inkhar leh a. A inhawn leh a inkhar hun inkara trade thleng zawng zawng hi chhinchhiah sen vek a nih loh avangin khaikhawmna ṭha tawk tak, kan hriattur pawimawh min hrilh thei kan mamawh ta a.

Stock man chet dan (price action) khi Open, High, Low leh Close hmang hian kan khaikhawm thei ta a ni.

Open Price - Market chu trade theiha a inhawn chiaha leitu leh hralhtute inremna man hmasa ber emaw trade thlenna man hmasa ber kha Opening price kan ti a. Market inhawnna man pawh kan ti thei awm e.

High Price - Khimi ni a stock man an trade to lai ber. Stock man a san lai ber.

Low Price - Khimi ni a stock man an trade lawm lai ber. Stock man a hniam lai ber.

Close Price - Close price chu stock a inkharna man hi a ni a, a pawimawh ber a ni ṭhin bawk. Stock inkharna man leh a inkhar dan hian leitu leh hralhtute phur dan a hril a, a tuka market a inhawn dan zirchian nan leh a inhawn dan zat tehfung atan a pawimawh hle bawk. Market inkharna hi a inhawnna aia a sang zawk a nih chuan khami niah khan chhoh lam kan pan kan ti thei ang a. Market inhawnna aia a inkharna man a hniam zawk chuan khami niah khan hniam lam kan pan kan ti thei bawk ang.

Stock inkharna man hian market marphu leh a tel a te rilru put hmang min hrilh chiang thei hle a. Market inhawnleh dan a ṭhat leh ṭhat loh enfiah nan pawh a ṭangkai hle. Hengte a nih avangin, closing price hi market/stock inhawnna, san lai ber emaw hniam lai ber aiin a pawimawh zawk a ni.

Technical Analysis thlirna tlang aṭanga pawimawh zualte chu Open, High, Low leh Close price-te an ni tih a chiang thawkhat tawh awm e. Heng pali te hi chart hmanga zirchian a nih dawn chuan, chart-ah chuan kan thai lan a lo ngai ta a ni.

daily trade pattern

He zirlai aṭanga kan zirchhuahte

  1. Technical Analysis hi asset hrang hrangah a hman theih.

  2. Technical analysis thubulte.

    • Stock manah engkim a lang chhuak tawh.
    • Thil thlen chhan aiin a thlen dan a pawimawh.
    • Stock man kal dan hian awn lam (trend) a nei a ni.
    • Thil thleng tawh hi a thlen nawn leh ṭhin.

  3. Stock/market man chet dan khaikhawmna ṭha ber chu Open, High, Low, leh Close price (OHLC) hmanin a ni.