Clearing & Settlement kalphung
Market ruangâm
Stock market leh i account inkara pawisa chet vel dan i hriatthiam nan Clearing & Settlement kalphung hriat hi a pawimawh hle. Entir nan, Marico share 100 i lei chuan i share lei chu broker-in i demat account-a dah lut turin eng te nge a tih ṭula, eng chen nge hun a duh tih chu chiang taka kan hriatthiam a ngai a ni. Stock lei bakah hralh chungchangah pawh a kalphung hi thuhmun reng a ni.
Clearing & settlement chungchang kan hriat fiah tâwk lohna hian market ruangâm leh a hnathawh dan kan hriatna kawngah zawhna chhân theih loh tam tak a hnutchhiah theih avangin he bungah hian share i lei aṭanga i DEMAT account a luh thlenga a phêna thil thlengte kan chhui dawn a ni.
He zirlaiah hian clearing & settlement chungchanga kan hriat turte chiang taka sawiin entirna nen kan en ho dawn a ni.
Stock i lei chuan eng nge thleng?
Day 1 – Trade Day (T Day), Monday
Thawhtanniah Reliance Industries share 100 chu share pakhat ₹1,000/- hisapin i lei a. I share lei zawng zawng hlutna chu ₹1,00,000/- (100 * 1000) a ni. Transaction i tih ni (share i lei ni) chu trade lâk ni a ni a; broker chuan 'T Day' tiin an sawi thin. Reliance Industries stock hi i Demat account-ah ni/thla/kum eng emaw zat kawl turin i leiah ngai ta ila; chuvangin he i trade lak hi intraday a ni lo.
Share lei tura order i siam chuan broker-in i sum mamawh zat i nei tling em tih a lo finfiah hmasa tê tê a. He entirna atang hi chuan i trading account-ah ₹1,00,000/- i neih tlin chauhin i order chu kalpui a ni ang; i neih tlin loh chuan i order chu reject (hnawl) a ni dawn a ni. Zerodha hmanga trade i lak chuan a hnuaia table kan tar lan hi fee i chawi belh turte an ni ang –
| Sl. No | Fee i chawina tur te | I chawi zat tur | Amount (₹) |
|---|---|---|---|
| 01 | Brokerage (Broker-in fee an lak zat) | Equity delivery (ni 1 aia rei share i kawlin) ah chawi a awm lo. Intraday-ah chuan i order zat atanga 0.03% emaw ₹20 (a tlem zawk zawk) | Zero |
| 02 | Security Transaction Charges (STT) | Turnover (Stock lei/hralh hlutna zat) atanga 0.1% | 100/- |
| 03 | Exchange Transaction Charges | Turnover (Stock lei/hralh hlutna zat) atanga 0.00345% | 3.45/- |
| 04 | GST | Broker-in fee a lak zat atanga 18% + Transaction charges + SEBI charges | 0.62/- |
| 05 | SEBI Charges | I transaction value atangin 1 crore zelah ₹10 lak a ni. | 0.12/- |
| Total | Total | Total | 104.19/- |
Khing bakah khian stock i leina hlutna (transaction value) atanga 0.015% chu stamp duty-ah chawi a ṭul bawk a. Entirna kan pekah hian stamp duty chawi ngai zat chu ₹15/- a ni. Tichuan, a vaia fee i chawi zat tur chu ₹119.19 a lo ni ang. Fee chawi ngai zat hi danglam thei a ni a; stock lei leh hralh i tih dawn chuan Zerodha Brokerage calculator hmangin i chawi ngai zat chu i hre thei ang.
Transaction i tihna atana i mamawh zawng zawng chu – share man ₹1,00,000 bakah fee hrang hrang belhkhawm ₹199.19 nen a vaiin ₹1,00,119.19/- a lo ni ta a. Kan hriat reng tur chu trade kan lak hian kan pawisa (₹1,00,119.19) chu kan account-ah khawih chet theih lohin a in-block nghal a; kan stock lei pawh chu kan DEMAT account-ah a lut nghal mai lo bawk.
Tin, T day-ah hian broker chuan i in register-na email-ah 'contract note' copy a rawn thawn bawk ang. Contract note chu ni khata share i lei leh hralhna zawng zawngte chipchiar taka tar lanna bill a ni a. Nakina i en let leh theih turin contract note chu i dah ṭha thei bawk. Contract note-ah chuan share i lei leh hralhna bakah i trade lakna chhinchhiahna (reference number) leh broker hnena fee i chawi zawng zawngte chu chipchiar takin tar lan a ni.
Day 2 – Trade Day + 1 (T+1 day, Tuesday)
January 2023 aṭang khan India chu stock exchange-a scrip (share) in-list zawng zawngte tana T+1 settlement kalpui hmasa ber ram a ni a. Hemi hma hi chuan miin share a lei reng rengin a leitu demat account-ah T+2 day-ah a lut ṭhin a. Entir nan, Monday-ah share i lei chuan Wednesday-ah i share lei chu i demat account-ah a lut ang. T+1 settlement an kalpui hnu chuan Monday-a i share lei chu a tûk Tuesday-ah i demat account-ah a lut tawh dawn a ni.
Chuvangin share i lei aṭanga a ni hnihna, T+1 an tih bawkah chuan exchange-a indawrna chu chinfel (settlement) a ngai ṭhin a ni. Share leitu leh hralhtu chuan broker hrang ve ve an hmang a nih chuan clearing corporation chuan share leitu broker pool account aṭangin pawisa a cut ang a, share hralhtu broker pool account-ah a dah lut ang. Tin, T+1 day hian share leitu DEMAT account-ah a share lei chu a lo lang bawk ang. Entir nan, Thawhtannia Reliance Industries i lei kha Thawhlehniah i DEMAT account-ah a lo lang ang.
Stock i hralh chuan eng nge thleng?
Stock i hralh ni chu 'T Day' a ni leh a. I DEMAT account aṭanga stock i hralh rualin i stocks hralhte chu khawih chet theih loh turin block a ni ang a, indawrna chinfel (settlement) tur a la nih avangin chumi ni tâwp lamah chuan i share hralhte chu 'earmarked' (chhinchhiah bik) an ni ang.
T+1 day a thlen hmain earmarked shares-te chu depository-ah an dah lut ṭhin a. Indawrna chinfel ni (settlement day) ah khawih chet theih loh tura share an block-te chu i demat account aṭanga lak chhuah niin, clearing corporation-ah pawisa lo luh hun nghakin an awm rih a ni. Heng shares te lak chhuah a nih rual hian (transaction i tihnaa fee i chawi zat turte paih a nih hnuah) i hralhna man pawisa chu i dawng bawk ang. T-Day ah i hralhna man aṭanga 80% chu i dawng nghal ang a, a bak 20% chu T+1 ah i dawng thung ang. Share leituin T+1 ah a share leite a account-a a hmu ang bawkin share hralhtu pawh hian a hralhna man chu T+1 ah a dawng kim vek a ni.
T-day leh T+1 inkara indawrna chinfelna kawng hi a hautak em em a; stockbroker te, clearing corporation te, depository leh stock exchange te chuan transaction fel tak a awm theih nan file tam tak an inthawn kual ṭhin a ni. He indawrnaa i hriat reng tur chu – equity transaction chu T+1 a tihfel ṭhin a ni; chumi awmzia chu leitu i nih chuan T+1 ah share i dawng ang a, hralhtu i nih chuan T+1 ah i hralhna man pawisa chu i dawng kim ang.
Earmarking chu eng nge ni?
Tun hma chuan indawrna chinfel a nih dawnin broker chuan an client-te share hralh chu an demat account aṭanga la chhuakin broker pool account-ah an kawl lailawk ṭhin a, T+2 ah securities chu clearing corporation (CC) hnenah an transfer ṭhin a ni. An transfer hnuah share hralhna pawisa chu client account-ah a lo lut ang a, tichuan transaction chu chinfel a ni ta chauh ṭhin. Broker-te chuan T-day emaw T+1 ah share chu la chhuakin, T+2 ah CC-ah an transfer leh mai ṭhin a ni (hetih hun lai hian settlement chu T+2 a kalpui ṭhin a ni).
Share lak chhuah aṭanga CC hnena transfer a nih hma thleng hian client shares chu broker pool account-ah a awm ṭhin a. He hun chhung hi broker-te tân dik lo taka securities hman theihna hun remchang a siamsak theia hriat a nih avangin chumi laka inven nan SEBI chuan 'earmarking' hi a ruahman ta a ni. He earmarking system tharah hian shares chu client account aṭanga la chhuak tawh lovin indawrna chinfel hun atana earmarked (chhinchhiah) chauh an ni ta a ni. Earmarking chu client-in sale transaction a siama, indawrna chinfel a nih hmaa securities lo kawl lailawkna angin a ngaih theih awm e.
Settlement day-ah chuan share-te chu investor account aṭanga la chhuakin clearing corporation-ah thawn ṭhin a ni. He kalphung thar hian broker-ten client-te share an pool account-a an lo hrên lailawk sak ṭhin chu a titâwp a, dik lo taka chet theihna kawng chu a dansak ta a ni. Earmarking hi November 2022 aṭang khan zawm ngei ngei tura kalpui ṭan a ni.
He zirlai aṭanga thil pawimawh kan zir te:
- Transaction i siam ni, share i lei/hralh ni chu 'T Day' tia sawi a ni.
- Broker chuan T-day ral hmain transaction i siamna zawng zawng chipchiar taka tar lanna 'contract note' chu a pe chhuak ngei tur che a ni.
- Share i leiin, i share lei chu i DEMAT account-ah T+1 day ral hmain a lo lut ang.
- India rama equity/stock settlement zawng zawng hi T+1 hmanga tihfel vek a ni.
- Share i hralhin, i share hralhte chu i account-ah block nghal an ni a; i hralh aṭanga i sum hmuh chu T+1 day-ah a lo lut ang.
- Securities te chu client demat account aṭangin broker pool account-a sawn an ṭul loh nan earmarking hi ruahman a ni.
Support Robawm:
