Skip to content

Call option hralh chungchang

Leitu an awm chuan hralhtu an awm

Zirlai hmasa lamah khan call option leitu thlirna leh dinhmun aṭangin thil nihphung kan sawi a. Call option leitu an awm a nih chuan, a hnena hralhtu emaw, lo zuartu emaw an awm ve a ngai tihna a ni. Vawiinah chuan call option hralhtu thlirna tlang aṭangin thil awmzia kan zir ve thung ang a, options i trade huna zawhna pawimawh tak - a zuartu nge a leitu nih i duh zawk? tih zawhna chhan kawngah pawh a pui ngei ang che.

Kan chhinchhiah hmasak ber tur chu hei hi a ni awm e - option seller (hralhtu) chan (loss) zat chu option buyer (leitu) tan hlawkna a ni thung ang a, option seller (hralhtu) hlawkna zat chu option buyer (leitu) chan zat a ni ve thung ang tih hi. Entir nan, option hralhtu ₹70 hlep hi option leitu chan zat a ni ang. Chutiang bawkin, option leitu ₹70 hlep hi option seller chan zat a ni ve bawk ang. Heti hian han sawifiah leh ta ila -

  • Option leitu chuan chan theih zat a nei a, chu chu premium atana a pek zat kha a ni. Hei aia tam hi a chan thei lo. Option leituin premium a pek lo dawngtu chu option hralhtu a ni a. Option hralhtu chuan premium a dawn aia tam hi hlep a nei thei lo thung. Option leitu chuan Limited Risk/Loss a nei a, option hralhtu chuan Limited Profit a nei thung tihna a ni.

  • Option leituin Unlimted Profit, tiam chin awm lova hlawk theihna a neih chuan option hralhtu ve thung chuan Unlimited Risk, tiam chin awm lova sum chan theihna a nei thung ang.

  • Breakeven point kan tih kha option leitu in sum a siam ṭanna lai tih kha a ni a. Heti lai hi option hralhtuin sum a chan ṭanna lai a ni ve thung ang a, Breakdown point kan ti ve thung ang.

  • Option leitu chuan ₹X zat profit a neih chuan, lehlama option hraltuin ₹X zat loss a nei tihna a ni.

  • Option leituin ₹X zat loss a neih chuan lehlama option hralhtuin ₹X zat a profit ve thung tihna a ni.

  • Call option leitu chuan strike price eng emaw chungah stock man a chhoh a ring a nih chuan, call option hralhtu chuan strike price eng emaw ah tak emaw a aia hniamah stock man a awm a ring tihna a ni ve thung.

Heng kan sawi te khi hrethiam leh zual turin Call Option hralhtu thlirna aṭang kan sawi zau leh ang.

I chhiar chhunzawm hmain - he zirlaiah hian zirlai hmasa lama entirna kan pek tam tak kha kan ring nawn leh dawn a. Kan thil sawi te pawh i hriat tawh sa a ang viau thei. Chuvang chuan uluk taka chhiar turin ka chah duh che a, hriat hnu a an avanga chhiar liam puat lo turin ka ngen a che.

Call option hralhtu ngaihtuahna

Options zirlai pa 1-naa Sanga leh Mawia hmanga tehkhin thu kan pek kha i la hre awm e. Chu entirnaah chuan thil thleng thei pathum kan sawi a -

  1. Ram man chu ₹5,00,000 aiin a sang chho (Sanga tan hlawkna - call option leitu).

  2. Ram chu a man ngai ₹5,00,000-ah a awm chhunzawm (Mawia tan hlawkna - call option hralhtu).

  3. Ram man chu ₹5,00,000 aṭang a tlahniam (Mawia tan hlawkna = call option hralhtu).

I zirchian deuh chuan option leitu hian thil thleng thei pathuma ṭhena pakhat chiah hlawk theihna a nei a, thil thleng thei pathum aṭang hi chuan option leitu hi dinhmun ṭha lova ding sa ang tluk a ni. Option hralhtu chuan 66.67% hlawk theihna 'chance' a nei tihna a ni. Option seller hian market thlir dan leh zirchian dan a thiam phei chuan hlawkna a siam theihna 'chance' chu a tisang leh zual thei bawk.

Heta 'chance' ka sawi hi chhiarkawp (statistical) aṭanga tehchhuah a ni tih hria la, options hralhtu hi 100/100-ah a profit chuang lo tih hriat a ṭha awm e.

Zirlai hmasa lama entir nana kan hman 'Infosys' hmang khan entirna han pe leh ta ila. Infosys chart hi en nawn lehin call option seller thlirna chu hrilhfiah i tum ang le -

infosys chart

  • Infosys stock hi na takin market-in a lo nawr tla tawh a, chiang takin chhoh lam ai mah chuan tlak lam a awn kan ti thei ang.

  • Stock chu a tlat nat tawh em avangin trader leh investor tam tak la cham bang leh tang laklawhte chuan chhuahna tur an zawn a rinawm.

  • Stock man chho deuh hretah trader leh investor la tangte chuan chhuahna remchangah ngaiin an investment aṭang chuan an chhuah beisei theih a ni ang.

  • Hetiang a nih avangin stock man hian chhoh lam a pan mai a rinawm rih loh a - a bik takin tunhnaiah chuan a chhoh mai a rinawm rih loh.

  • Stock man chu a san chhoh loh a rinawm zawk avangin, Infosys call option chu hralh a, a lo leitu aṭanga premium lo dawn chu trade dan kawng ṭha berah a ngaih theih ang.

Heng thlirna hrang hrangte avang hian option zuartu (option writer/seller kan ti ṭhin) chuan call option hralh chu a tum ta a. I lo chhinchhiah tur pawimawh chu - option writer hian Infosys stock man tun hnaia a chhoh a beisei loh avangin call option hi a hralh tih hi a ni awm e. Option writer thlirna aṭang chuan call option hi hralha, a lo leitu - buyer hnen aṭanga premium dawn kha trade dan kalphung ṭha berah a ngai a ni.

Zirlai hmasaah khan strike price thlan fimkhur a ngaih zia leh a pawimawh zia kan lo sawi tawh a. Kan sawi zau leh hret bawk ang. Tun atan chuan, option seller chuan Infosys strike price 1120 call option chu hralha ₹37.40 premium chu dawn a tumah ngai ila. A hnuaia option chain-ah hian chiang takin ka thai lang a -

infy option chain

Zirlai hmasa lama kan lo tih tawh ang khan call option seller tana Profit leh Loss a awm theih dan turte han bih chiang ila. Zirlai hmasa lama intrinsic value kan sawi pawh kha he zirlaiah pawh hian a rin theih ang.

Sl No. Spot Price expire-na Premium dawn tur zat Intrinsic Value (IV) P&L (IV + Premium)
01 1000 (+) 37.40 1000 - 1120 = 0 = 37.40 - 0 = +37.40
02 1020 (+) 37.40 1020 - 1120 = 0 = 37.40 - 0 = +37.40
03 1040 (+) 37.40 1040 - 1120 = 0 = 37.40 - 0 = +37.40
04 1060 (+) 37.40 1060 - 1120 = 0 = 37.40 - 0 = +37.40
05 1080 (+) 37.40 1080 - 1120 = 0 = 37.40 - 0 = +37.40
06 1100 (+) 37.40 1100 - 1120 = 0 = 37.40 - 0 = +37.40
07 1110 (+) 37.40 1110 - 1120 = 0 = 37.40 - 0 = +37.40
08 1120 (+) 37.40 1120 - 1120 = 0 = 37.40 - 0 = +37.40
09 1140 (+) 37.40 1140 - 1120 = 20 = 37.40 - 20 = +17.40
10 1160 (+) 37.40 1160 - 1120 = 40 = 37.40 - 40 = -12.6
11 1180 (+) 37.40 1180 - 1120 = 60 = 37.40 - 60 = -22.6
12 1200 (+) 37.40 1200 - 1120 = 80 = 37.40 - 80 = -42.6
13 1220 (+) 37.40 1220 - 1120 = 100 = 100 + (-37.40) = +62.6
14 1240 (+) 37.40 1240 - 1120 = 120 = 37.40 - 120 = -82.6

A chunga table-a thil awm dan kan sawifiah hmain, hengte hi lo chhinchhiah ila -

  1. 'Premium dawn tur zat' tih tlar thlaa '+' (positive sign) hian option writer/seller hnenah sum a lut (cash inflow) tih a entir.

  2. Expiry ni a option contract intrinsic value tur chu call option buyer tan a ni emaw seller tan a ni emaw inang ve ve ang.

  3. Option seller Net Profit & Loss chhut dan tur chu a danglam hreta, hetiang hian a ni:

    1. Option seller-in option a hralh hian premium a dawng ṭhin (eg., ₹37.40). Expire a thlena Loss nei tur chuan a premium dawn zat aia tam a loss phawt a ngai. Entir nan, ₹37.40 premium dawng ta sela, ₹30 loss-in awm ta se, ₹7.40 a la hlep tho tihna a ni. Hetiang a nih avang hian option seller-in loss a hmu dawn a nih chuan a premium dawn zat aia tam a loss a ngai tihna a ni. Premium a dawn zat aia tlem a lo chan deuh a nih pawhin, a belhkhawmnaah hlep a la nei tho tihna a nih chu. Chuvangin Profit & Loss kan chhut dan tur chu hetiang hian a ni: Premium - Intrinsic Value.

    2. A chunga kan sawi kalhmang tho hi option buyer tan a hman theih awm e. Option buyer chuan premium a pek ṭhin avangin, expiry day-a hlep nei tur chuan premium a pek zat chu a hmuh let phawt a ngai. Chuvangin, option buyer P&L chhut dan tur chu: Intrinsic Value - Premium.

A chunga table khi hriatthiam a awl ta deuhin ka ring a. Tunah chuan khi table zirchianna hun i han hmang leh ang. Strike price kan thai sen 1120 khi chhinchhiah bawk ila -

  1. INFY share man hi 1120 strike price-ah emaw, 1120 hnuaia a awm chhung chuan option seller hian expiry day-ah hlawkna a siam thei ang. 1120 strike price hnuaia INFY share man a awm chhung chuan premium 37.40 a hum thei ang te pawh kan ti thei awm e. Premium a dawn tur zat (hlep tur zat) hi 37.40 a ni reng ang tih hriat a ṭha awm e.

    1. Chhinchhiah tur pawimawh 1-na: Underlying spot price chu strike price-ah emaw strike price aia hniamah emaw a expire chhung chu option seller hian premium a dawng kim thei ang.

  2. INFY share price hian 1120 strike price a han pel chho chhunzawm zel a nih chuan Option seller chuan loss a hmu ve thung ang.

    1. Chhinchhiah tur pawimawh 2-na: Underlying spot price chuan strike price aia sang a han thleng chho a nih chuan call option seller-in loss a hmu ang. Spot price chu Strike price aṭanga a han chhoh thui poh leh loss a tam ang.

  3. Chhinchhiah tur pawimawh 1-na leh 2-na aṭang hian Option seller chuan hlep theih zat limited profit leh tiam chin awm lova channa (unlimited loss) a nei thei tih kan hrethiam awm e.

Chhinchhiah tur pawimawh 1-na leh 2-na hi formula-a kan dah chuan Call option seller Profit & Loss chhut nan a hman theih a. A formula chu hetiang hian a ni

P&L = Premium - Max [ 0, ( Spot Price - Strike Price ) ]

He formula hmang hian, spot price expire-na zat a zira call seller P&L tur i han chhut chhuak chhin ang. Heng spot price hmang hian -

  1. 1110
  2. 1160
  3. 1150

1110-ah spot price expire ta sela

= 37.40 - Max [ 0, ( 1110 - 1120 ) ]

= 37.40 - Max [ 0, -10 ]

= 37.40 - 0

= 37.40

He chhanna hi chhinchhiah tur pawimawh 1-naa kan sawi nen khan a inzul zui thlap a ni (Underlying spot price chu strike price-ah emaw strike price aia hniamah emaw a awm chhung chu option seller hian premium a dawng kim thei ang).

1160-ah spot price expire ta sela

= 37.40 - Max [ 0, ( 1160 - 1120 ) ]

= 37.40 - Max [ 0, 40 ]

= 37.40 - 40

= -2.6

He chhanna hi chhinchhiah tur pawimawh 2-naa kan sawi nen khan a inzul zui thlap a ni (Underlying spot price chuan strike price aia sang a han thleng chho a nih chuan call option seller-in loss a hmu ang. Spot price chu Strike price aṭanga a han chhoh thui poh leh loss a tam ang).

1150-ah spot price expire ta sela

= 37.40 - Max [ 0, ( 1150 - 1120 ) ]

= 37.40 - Max [ 0, 30 ]

= 37.40 - 30

= 7.40

Spot price expire-na hi strike price 1120 aiin sang zawk mah se call option seller hian hlep a la siam tho niin a lang. Hei hi chhinchhiah tur pawimawh 2-naa kan sawi nen khan a inzul zui ta hauh lo mai. Zirlai hmasa lamah Breakeven chungchang kan lo sawi tawh a, i ngaihtuah let chuan heta call option seller-in hlep a la neih theih chhan hi i chhut thiam awm e.

Thil nihphung han chhui chiang leh zual ila. Strike price atana kan thlan 1120 hnaih leh a bawr vel hi han chik deuh ila, engtinnge P&L a awm theih dan i han chhut chhuak chhin ang.

Sl No. Spot Price expire-na Premium dawn tur zat Intrinsic Value (IV) P&L (IV + Premium)
01 1119 (+) 37.40 1119 - 1120 = 0 = 37.40 - 0 = +37.40
02 1120 (+) 37.40 1120 - 1120 = 0 = 37.40 - 0 = +37.40
03 1121 (+) 37.40 1121 - 1120 = 1 = 37.40 - 1 = +36.40
04 1123 (+) 37.40 1123 - 1120 = 3 = 37.40 - 3 = +34.40
05 1126 (+) 37.40 1126 - 1120 = 6 = 37.40 - 6 = +31.40
06 1132 (+) 37.40 1132 - 1120 = 12 = 37.40 - 12 = +25.40
07 1154 (+) 37.40 1154 - 1120 = 34 = 37.40 - 34 = +3.40
08 1157 (+) 37.40 1157 - 1120 = 37 = 37.40 - 37 = +0.40
09 1159 (+) 37.40 1159 - 1120 = 39 = 37.40 - 39 = -1.60
10 1160 (+) 37.40 1160 - 1120 = 40 = 37.40 - 40 = -2.6

Table aṭanga a lan danah chuan INFY spot price chu kan strike price thlan 1120 chungah awm mah se option seller chuan hlep a la nei thei tho tih a lang. Option seller chuan strike + premium dawn zat level thleng hlep a la nei thei zel a ni. Hlep a neih tawh lohna lai hi Breakdown point kan ti thei awm e.

Call option seller breakdown point = Strike price + Premium Received.

INFY example-ah chuan,

= 1120 + 37.40

= 1157.40

Call option buyer breakeven point hi call option seller breakdown point a ni nghal tihna a ni.

Call Option seller pay-off

call seller payoff chart

Call option seller P&L payoff graph hi enchian chuan call option buyer P&L payoff graph letling kha a ni deuh mai a. A chunga call option seller payoff graph leh kan lo sawi tawhte kha hetiang hian an inhmu rem a -

  1. Call option seller profit theih zat chu Premium a dawn tur aiin a sang thei lo. Entirna kan pekah khan premium chu 34.70 a ni a. Strike price 1120 hnuaia spot price a expire chhung chuan 34.70 hi call seller profit tur chu a ni a, hei ai hian a tam thei lo bawk.

  2. Spot expire-na price chu 1120 aia a san chhoh zel chuan profit a tlem tial tial a, 1157.40 hi breakeven point a ni bawk. 1157.40 aia sanga spot price a expire chuan call option seller chu loss in a awm ang.

  3. 1157.40-ah hian expire ta sela call option seller chuan profit leh loss a nei lo ang.

  4. 1157.40 chunglamah call option seller chuan loss a nei dawn a, P&L Line (blue line) awih dan zawng hian loss tam zat tur a entir bawk.

Margin chungchanga hriattur pawimawh

Call option buyer leh call option seller-te risk neih dan hi ngaihtuah chiang ta la. Call option buyer chuan seller hnena premium a pek bak chu Loss belh theih a nei lo.

Amaherawh chu, call option seller ve thung chuan unlimited risk a nei tlat thung. A strike price hralhna level piah lama spot price a han chho a nih chuan Loss tam tak a nei thei a ni. Hetiang a nih avang hian, he buyer leh seller-te inkara trade thlen tirtu stock exchange chuan option seller-in risk sang tak a ken tel hi engtinnge ven a nih theih ang tih an ngaihtuah a ṭul ta hle a ni. Option seller hian Loss tam tham tak neiin pe tla thei lo (default) ta se, tih hi an ngaihtuah thlen a ngai ta a ni.

Pek tura an intiam zat pek theih lohna hi Default Risk kan ti a. Default Risk a thlen loh nan stock exchange chuan option seller chu sum eng nge maw zat an kiangah a dah lailawk tir ṭhin a ni. Hei hi Margin kan tih chu a lo ni ta a ni. Option seller-in margin a mamawh zat hi futures contract trade turina margin a mamawh zat nen a inang thuak ṭhin a ni.

A hnuaia thlalakah hian INFY futures leh 1000 Call option sell dawna Margin neih ngai zat tarlan a ni. 27th October expiry hman a ni.

infy futures margin

A hnuaia thlalaka Total Margin tih hi 1000 Call option sell-nan a margin ngai zat a ni.

infy options margin

Futures lei tura margin ngai zat leh call option sell tura margin ngai zat khi a inang thuak tih kan hmu thei awm e.

Khaikhawmna tawite

Call option lei leh hralh chungchang chu kan lo zir chipchiar ta hle mai. Finance-a thupui dangte aiin options-ah hian hriattur leh zir tur hi a tam zawk ti ila kan sawi sual awm lo ve. Chuvangin, kan lo zir tawh sa te hetiang hian han khaikhawm ta thuak thuak ila.

Option Buying

  • Underlying asset manah i bullish a nih chuan call option i lei thei. Expiry day-a hlawkna nei tur chuan underlying asset / spot price chu i strike price thlan aia sang daihah a expire a ngai.

  • Call option buying / call option lei hi 'Long on a Call Option' emaw 'Long Call' an ti bawk.

  • Call option i lei hian a lehlama call option seller hnenah premium i pe.

  • Call option buyer chuan chan theih zat (limited risk) a nei a. A chhe ber pawh thlengse a chan theih zat chu seller hnena premium a pek zat kha a ni. Call option buyer hian unlimited profit a nei thung.

  • Breakeven point-ah chuan call option buyer chuan hlep a nei lo va, chan pawh a nei lo ang.

  • P&L = Max [ 0, (Spot Price = Strike Price) ] - Premium Paid

  • Breakeven point = Strike Price + Premium Paid

Option Selling

  • Expiry niah, underlying spot price chu eng strike price emaw aia sangah a awm dawn lo va i rin chuan Call option seller-ah i ṭang thei ang.

  • Call option selling hi 'Shorting a Call option' emaw 'Short Call' kan ti bawk.

  • Call option seller-a i ṭan hian premium i dawng ṭhin ang.

  • Option sell-tu hlep neih theih zat chu premium a dawn tur zat a ni a, premium a dawn tur zat aia tam hlep a nei thei lo. Loss a neih theih zat erawhin tiam chin a nei lo thung (unlimited loss).

  • Call seller breakdown point-ah chuan seller hian premium a dawn zat chiah chiah a pe let a, hlep nei lo leh chan nei lovin a awm ang.

  • Option selling hian tiam chin awm lo channa (unlimited loss) a siam theih avangin option seller chuan Margin a Deposit a ṭul.

  • Option selling-a Margin deposit ngai zat hi, Futures-a margin ngai zat nen a intluk thuak ṭhin.

  • P&L = Premium - Max [ 0, (Spot Price - Strike Price) ]

  • Breakdown point = Strike Price + Premium Received

Hriattur pawimawh dangte

  • Stock eng emawa i thlirna a bullish chuan chu stock share chu i lei thei a, chu stock futures chu lei thei bawk a, a nih loh vek pawhin chu stock call option chu i lei thei bawk.

  • Stock eng emawa i thlirna a bearish chuan stock share chu intraday-in i short sell thei a, stock futures chu i short thei bawk a, a nih loh vek pawhin chu stock call option seller-ah i ṭang thei bawk.

  • Call option intrinsic value chhut dan chu buyer i ni emaw, seller i ni emaw, a danglam lo.

  • Put option intrinsic value chhut dan erawh call option aṭang a hrang thung.

  • Call option buyer leh seller-te Net P&L chhut dan a hrang bawk.

  • Kan lo zir tawh chinah, a awlsam zawk nan expiry-a Profit and Loss awm dan tur aṭang vekin kan la sawi a ni.

  • Hlawkna kan neih leh neih loh tur chiang taka hriat nan, expiry kan nghah thlen a pawimawh.

  • Tehkhinthuin, chawhma lamah INFY 1120 Call option chu 37.40-in lei ta ila, he option contract ka lei hi chawhnu lamah 40-ah pawh a chho thei a, ka duh chuan hlep neiin ka hralh leh nghal thei bawk.

  • Premium man hi, chhan tam tak vangin a inthlak danglam reng, chung a chhante chu kan la zir zau zel ang.

  • Call option hi 'CE' tia ziah tawi mai ṭhin a ni. INFY 1120 Call option hi INFY 1120 CE tiin kan dah thei bawk. CE tih awmzia chu 'Call European' tihna a ni.

European leh American Options danglamna

India market-a options hman ṭan a nih khan, options chi hnih a awm a, chungte chu - European leh American Options-te an ni. Index option-te (Nifty, Bank Nifty options) chu European vek an ni a, stock option-te chu American an ni thung. European leh American optons-te danglamna chu 'exercise' danah a ni awm e. Sawifiah tum ila -

European Options- European option contract-ah chuan option buyer hian a thuneihna (rights) hmang tur chuan expiry-ni a nghah thlen a ngai a. Settlement pawh expiry-ni a spot market hlutna zat a zirin a thleng ang. Entir nan, INFY 1120 Call option chu lo lei ta ila, hlawkna nei tur chuan expiry niah INFY chu ka breakeven point aia sangah a inkhar a ngai tihna a ni. Intrinsic value neiin expire pawh ni sela, seller hnena premium ka pek zat ka hmuh let theih loh chuan hlawkna nei lovin ka awm dawn tho tihna a ni.

American Options- American option contract-ah ve thung chuan option buyer hian a thuneihna (rights) expiry ni a thlen hma eng hunah pawh a hmang thei thung. Chuvangin, settlement chungchangah pawh expiry ni-a spot market hlutna man zatah a innghat tawh lo va, option buyer-in a thuneihna a hman laia spot market hlutna manah setllement pawh chu a innghat ve thung ang. Entir nan, INFY 1120 Call option chu spot price 1110 a nih laiin lei ta ila, expire-nan ni 20 la awm bawk ta sela. Ka lei tukah chuan INFY spot price chuan 1120 a han pel chho hlauh mai a. Hetiangah hian American option hmanga ka trade a nih chuan, dinhmun ṭha zawka ka awm lai hian option buyer ka nihna anga thuneihna ka neih - INFY stock 1120 mana ka lei theihna chu ka hmang nghal thei a, option ka hnena lo hralhtu Seller chuan INFY stock chu 1120 manin, a intiam ang ngeiin, min pek a ṭul bawk. Expiry date hian pawimawhna a nei tam lo hle.

Option lo trade tawh ṭhin in awm a nih chuan, he zawhna hi i nei awm e - 'Rei lote chhung chauh kawl tura ka trade chuan, American emaw European emaw ka trade chuan danglamna leh pawimawhna em em a nei dawn em ni?' tih hi.

Zawhna zawh awm tak a ni. Sanga leh Mawia te ṭhian dun hmanga tehkhinthu kan sawi kha han ngaihtuah let leh ta ila. Mawia leh Sanga te inremsiamna kha European a ni a, thla ruk a liam hunah chauh Sanga khan a thuneihna (rights) kha a hmang thei a. Thla ruk ni lovin, a duh duh hunah Sanga hian a thuneihna hmang thei tur ni ta sela (American option angin), inremna an siam hnu lawkah highway siam a nih tur thu puan lo ni nghal bawk ta sela. Sanga hian Mawia ram chu lei nghal mai a duh dawn tihna a ni a, option buyer-a nih angin a thuneihna (rights) chu a hmang duh nghal ngei ang. Sanga hian a duh duh hunah a Rights chu a hmang thei tih Mawia hian a hriat ve dawn avangin Premium tlawm taka intiamnaa luh a duh bik hauh lovang le. Mawia hian Risk sang leh zual a ken tel dawn avangin, a risk lak mila Premium to leh man zawk a phut ve tlat ang.

Hetiang a nih avang hian, European option-te aiin American option-te premium chu a to zawk ṭhin a ni.

Kum 2010-ah khan stock options-a American Options hman a lo nih ṭhin chu NSE chuan a titawp tawh a. India market-a options kan trade reng reng hi tunah chuan European vek a ni tawh a. Buyer-in a thuneihna (rights) a hmang (exercise) dawn a nih chuan Expiry Day a nghah thlen ngei ngei a ngai tihna a ni.

He zirlai aṭanga kan zirchhuahte

  1. I bearish chuan call option seller-ah i ṭang thei ang.

  2. Call option buyer leh seller-te P&L chu a inep thawk.

  3. Call option seller i nih hian Premium i dawng ang.

  4. Call option seller i nih dawn chuan margin eng nge maw zat i deposit a ṭul.

  5. Call option seller-a i ṭan hian premium i dawn zat piah lamah hlep i nei belh lo ang. I chan theih zat erawhin tiam chin a nei lo thung.

  6. P&L = Premium - Max [ 0, (Spot Price - Strike Price) ]

  7. Breakdown point = Strike Price + Premium dawn zat

  8. India ramah chuan options zawng zawng hi European an ni.

Options trading hi i tui ve a nih chuan kan partner Zerodha hmang hian i lo trade ve dawn nia

(a hnuaia thlalak hi click rawh)

Zerodha Investment account hawng ve rawh le.