Trading Terminal zir chianna

Zirlai hmasa lama kan zir tâkte aṭang khan stock market chungchang thil tam tak kan hrethiam tlâng tawh awm e. Tunah chuan stock market-a share lei leh hralh dan a takin kan zir tawh dawn a ni. Transaction tih dan hi kawng thum a awm a --

1. Phone call hmanga stock broker biain (central support number atangin), stock i lei/hralh duh thu i thlen ang; hei hi 'Call & Trade' an ti.

2. Web application hmangin.

3. Mobile application hmangin.

A enga pawh khi hmang la, stock market luhna kawng a hawnsak dawn che a ni. An pathum khian stock market luhka te pawh kan ti thei awm e. Chuta i luh hnu chuan share i leiin i hralh thei tawh ang a, i Profit & Loss pawh i chhui thei ang. Tin, market chêt dan i vil thei ang a, i sum hman dan i vawng thei ang; stock chart i en thei ang a, trading puitu hmanraw hrang hrangte pawh hman mai theihin i ban phakah an awm tawh ang. Heng lo pawh hi thil dang tam tak a tih theih âwm e. He zirlai hian chu luhka 'Trading terminal' an tih bawk chu min hriat chiantir a tum ber a ni. Kan zirlai kan bel zawk nan min pui turin Zerodha trading terminal 'Kite' kan hmang dawn a. Broker dang i hmang a nih pawhin i broker-te trading terminal chu Kite nen a thil tih theih hrang hrang leh a hnathawh dan a inang reng (ngei ngei tur) a ni.

I chhiar thui hmain: he zirlaiah hian Zerodha Kite hman dan kan sawi dawn a, zerodha-ah account i hawng duh a nih chuan hemi link hmang hian i hawng dawn nia. Account hawn man a awm lova, a hawn dan tur i thiam loh chuan, hemi link hmang hian i en thei ang.

I browser-ah URL chhu lutin trading terminal chu i lut thei ang. Zerodha Kite hmang leh account nei tawh tan chuan kite.zerodha.com a ni. Trading terminal-a lut tur chuan i broker kal tlangin trading account i neih a ngai a. Trading terminal ṭha chuan hmanraw tam tak a nei a, chung zinga a ṭhen a zar chu bul ṭan nan kan enho dawn a ni. A tîr tê aṭanga kan hriatthiam theih nan a hmasain hna pahnih han intuk chhin teh ang.

1. ITC share 1 lei

2. Infosys share chet dan vil

He hna pahnih kal dan kan en rual hian a kaihhnawih hriat tur pawimawhte kan zir pah bawk ang.

Login dan

Trading terminal-ah hian i securities leh i sum hman dan zawng zawng a awm avangin a sensitive hle a. Trading terminal tihim lo thei thil lak aṭanga venghim tur hian SEBI chuan dan fel tak siamin khauh takin hma a la a ni. Venhimna ṭha tawk tak a awm theih nan hian broker-te pawhin login dan khauh tak chu an zawm a ṭul a. Trading terminal-ah chuan i broker-in user ID a pek che leh password hmang chauhin i lut thei a ni.

Login tih i hmeh hnu chuan i user ID leh password chu a dik ngei em tih finfiah a ni ang a, external TOTP (Time based one-time password) chhut luhna tur a rawn lang ang. TOTP hi a lampuma kan hmuh ang hian hunbi nei, second reilote chhunga inthlak danglam reng a ni a. TOTP chu Google authenticator emaw, Authy hmangin a hriat theih a ni.

TOTP i chhut luh hnuah i trading account chu a lo lang tawh ang. He article-ah hian TOTP chungchang leh login dan kalhmang hrim hrim bakah trading account vên uluk a ngaihziate chu sap ṭawnga tar lan a ni a, in lo chhiar ve ṭheuh dawn nia.

Market watch

I trading account-a i luh tawh chuan 'market watch' a dah tur stocks i thlang khawm ang. Market watch chu ziak loh lehkhapuan angah ngai ta ila. Market watch-ah hian stocks i dahte chu an chungchang i hriat duh angte i hmet chhuak zung zung thei a, stocks lei leh hralh pawh a tihawlsam phah sawt a ni. A hnuaia kan hmuh ang hi market watch, stocks engmah la dah khah loh a ni (i login hnua screen-a lo lang hmasa ber a ni bawk).

Equity hnuaia 600.2 leh commodities hnuaia 136.75 lo langte khi ka fund balance an ni a. A awmzia chu, khi trading account-ah khian equity lei nan (stocks lei leh hralh nan) ₹600 leh commodities lei nan ₹136 ka nei tihna a ni. A chung ber tlar ding lama Funds tih khi i hmeh chuan i bank account aṭangin i trading account-ah pawisa i dah lut thei a, i trading account aṭangin i bank account-a lut turin pawisa i la chhuak thei bawk.

Awle, tunah chuan kan hna hmasa zawk, ITC share 1 lei kha kan ṭan tawh ang a. A hmasa berah ITC Ltd chu market watch-ah kan dah lut ang. Chumi tur chuan a chung vei lama search bar-ah ITC tih kan chhu lut ang a, exchange hrang hrang (BSE/NSE) a ITC stock-te chu a hnuaiah a rawn lang ang.

'ITC' tih chauh hi kan duh ber chu a ni; a dang rawn lang ve ITC-BE, ITC-BL leh ITC-6 tihte khi chu pawisa siamna hmanraw dang an ni hlawm a, an chungchang hi hun dangah kan la sawi zau ang a. Tun ṭuma kan duh ber chu ITC share 1 (ITC stock) lei a ni a, a hmanraw milpui ber chu ITC tih khi a ni. ITC tih zawna i cursor i dah khan '+' symbol hi a lo lang ang a, i hmet ang. Tichuan, Market Watch-ah ITC chu a lo lang tawh ang.

Market watch i en chuan ITC stock last traded price (LTP) leh percentage change a lo lang ang.

• Last Traded Price (LTP) - ITC stock indawrna hnuhnung bera a man zat. LTP hian tun huna ITC hlutna/man zat a entir a ni.

• Percentage change - A hma ni chiaha market inkhar dawna stock man (previous day's close) leh LTP inthlauhna percentage-a lak.

Market ṭawngkam ṭhenkhat, zirlai hmasaa kan zir tlem han tar lang thar leh ila:

• Previous day's close -- A hming ang hian a hma ni chiaha market inkhar dawna stock hlutna a ni.

• OHLC -- Open, High, Low leh Close chuan ni khat chhunga stock man chet dan a tar lang (Zirlai hmasa lamah a sawifiahna a awm).

• Volume -- Hun tiam bik chhunga share lei leh hralh zawng zawng belh khawm.

Khing point pathumte khi Market Depth-ah en theihin a awm. A hnuaia tar lan ang hian ITC tih zawna cursor i dah chuan ding lamah Buy, Sell, Market Depth leh chart enna a rawn lang ang a. Market Depth i hmeh chuan a chunga kan sawi stock chungchanga hriat tur pawimawh tak takte bakah, best bid leh offer price ladder-te chu en theihin a awm ang. Bid leh Offer price chungchang hi a tawp lamah kan sawifiah ang.

Kan hmuh ang khian ITC last traded price chu ₹262.25 a ni a, a hma ni chiaha closing price (previous day's close) chu ₹263.30 a ni. Previous day's close aiin LTP hi -0.40% in a hlutna a hniam zawk a ni. Hemi ni atana Open chu ₹265.90 a ni a, High leh Low chu ₹265.90 leh ₹262.15 a ni. Hemi nia ITC stock lei leh hralh zawng zawng belh khawm (ITC stock volume) chu 27 lakh shares a ni bawk.

Trading terminal kal tlanga stock lei dan

Kan tum ber chu ITC share 1 lei a ni tih kha han hre thar leh ila. Kan trading terminal-ah chuan ITC kan dah lut tawh bawk a. Stock kan lei dawna kan tih tur hmasa ber chu buy order siam a ni.

• I stock lei duh zâwn pheia Buy (B) tih kha i hmet ang.

• A hnuaia mi ang hian Buy order form a rawn lang ang.

Order form-ah hian stock kan lei duh zat (quantity) leh kan lei duhna man zat (price) te ziahna tur a lo awm sa ṭhin a. Kan mamawh dan/duh dan azirin siam rem tur a ni. Order form chung ber aṭang hian han ṭan ila. Form reng rengah exchange hi NSE-ah thlan sain a awm ṭhin a, i duh chuan BSE-ah i thlak thei bawk. A hnuai chiahah Regular tih khi i hmet ang.

A dawtah chuan 'order type' kan thlang ang. Order type-ah hian chi 4 thlan tur a awm a, chungte chu --

• Limit

• Market

• SL

• SL-Market

Heng options palite hi han bêl chiang ila.

Stock lei duhna man zat bik i neih chuan 'Limit' order hi i thlang ang. Entirna kan pekah khian ITC last traded price chu ₹262.25 a ni a; nimahsela ₹261 in (LTP aia ₹1.25 a tlawmin) lo lei duh ta la, limit hmang hian stock i lei duhna man zat chiah chu Price tih hnuaiah khian i chhu lut ang. Limit hian stock kan leina man chungchangah thuneihna min pe a, a ṭha hle. Chutih rual erawh chuan, stock man chu kan limit price (₹261) ah a tla thla lo a nih chuan he order hi tihhlawhtlin a ni lo thung ang a, stock chu i lei thei dawn lo tihna a ni. Hei hi limit order hnufumna pakhat a ni. Limit order chu market inkhar hma (3:30 PM) thleng a nung a, chumi hnu lamah chuan i order chu cancel a ni ang.

Stock lei duhna man zat bituk sa (Limit price) i neih lem loh chuan market order hi i thlang thei a. Market order i siam chuan market-a stock man an chhiarna zat ang angin i lei dawn tihna a ni. Stock hralhtu an awm chhung chuan i order chu tihhlawhtlin a ni ang. ITC pawh chu ₹262.25 bawr velah i lei dawn tihna a ni. Tehkhin nan order i siam hma hian ITC hi ₹262.25 ah trade ta sela, order i siam zawh rualin ₹265 ah chho leh ta se; ITC chu ₹265-in i lei dawn tihna a ni. Market order kan siam hian kan leina man tur tak kan hriat lâwk loh avangin active trader tan chuan fimkhur a ṭul hle. Limit order ang lo takin market order chuan kan order siam chu a hlawhtlin ngei theih nan a thawk ṭhin a ni.

Stop-loss order ve thung chuan market-ah position i lak laia market che nasa lutuk lak aṭangin a veng che a ni. Tehkhin nan ITC chu nakin lawkah ₹275 a kai chhoh beiseiin ₹262.25 in i lei a. Mahse, ITC share man chu a tla ta daih mai a. Hetiang hunah hian hloh tura i inhuam zat chin bitukin i position lak chu i venghim thei a ni. Entir nan, i position lak aṭang hian ₹255 aia tam hloh inhuam lo ta la.

Chumi awmzia chu ITC-ah hian long position lain ₹262.25 in i lei a, hloh tura i inhuam zat chu ₹6 (255) a ni. Stock man chu ₹255-a a tlak vaih chuan stop loss order chuan exchange-ah hna a rawn thawk vat ang a, ₹6 aia tam i hloh theihna tur kha i pumpelh thei ta a ni. Stock man chu 255 chung lam a nih thung chuan stop loss order hian hna a thawk rih lo ang.

Stop loss order hian market-ah hna a thawk nghal rum rum lo va. A hna thawk tur hian trigger price siam a ṭul a ni. Trigger price chu stop-loss price aiin a sang tlangpui a. Kan trigger price bituk chu stock manin a hawlh thlen chiah khan stop-loss order chuan hna a rawn thawk chauh ṭhin a ni.

A chunga entirna khi han chhunzawm ta zel ila.

₹261-in long position kan la a. Market a tlak thulha inven nan ₹255-ah chhuah kan duh a. 255 hi kan stop-loss price chu a ni dawn a ni. Kan stop-loss order tinung tur hian trigger price kan siam a ngai bawk a. Stop loss price aiin a sang (emaw a inzat chiah) tur a ni kan tih tawh kha. Chuvangin, trigger price chu ₹255 emaw, a aia sangah kan bituk ang. Stock man hi 255 aia hniama a tlâk chuan stop loss order hi a rawn che nghal dawn a ni.

Kan buy order form-ah khan kan lêt leh tawh ang a, order type kan thlan fel hnu chuan stock kan lei duh zat kan ziak lut ang. ITC stock kan lei duh zat hi 1 a nih avangin quantity-ah khian '1' kan chhu lut ang. Trigger price leh disclosed quantity-te khi tun atan chuan kan ngaihthah rih ang a. A dawtah product type kan thlang leh ang.

I stock lei tur chu ni/thla/kum eng emaw zat kawl i tum chuan CNC i thlang ang a, i lei fel hnuah i Demat account-ah stock chu a awm ngei a ni tih i finfiah bawk tur a ni. CNC i thlan hian i broker hnenah hun eng emaw chhung atan kawl i tum a ni tih a lo hrilh dawn a ni.

ITC stock chu i lei ni la lain i hralh duh a nih chuan MIS i thlang thung ang. MIS hi margin product a ni a; derivatives lamah chiang zawkin kan la zir dawn a ni.

Order form-a dah khah turte i dah kim tawh chuan i order chu market-a lut turin peih fel a ni ta a. Form hnuai ber tlar ding lama Buy tih inziak chu i hmet ang a, order ticket number pek i ni ang.

I order chuan exchange a lut fel ta a. ITC stock manin ₹261 a thlen hma loh chu he i order hi tihpuitlin a ni lo ang. Stock man chu ₹261-a a tlak veleh (ITC stock hralh duhtu an awm chuan), i order chu a tlang chauh ang. I order tihpuitlin a nih veleh ITC share 1 neitu i lo ni tawh ang.

Order book leh Trade book

Order book leh Trade book hi trading terminal chhunga thil chhinchhiahna/register bu angah a ngaih theih awm e. Order book chuan exchange-a order i siam zawng zawngte a lo chhinchhiah ṭhin a; Trade book chuan i stock lei leh hralh tawh zawng zawng a lo chhinchhiah ve thung a ni. Hetiang hian han ngaihtuah ta ila -- Amazon-ah thil i lei dawnin i lei turte chu cart-ah i dah hmasa te te a. Chu cart chu order book chu a ni. I cart (order book) a i dahte chu i lei tak tak hmain i tidanglam thei a, i paih chhuakin i dah belh thei bawk. I lei turte i tihfel hnu chuan i lei fel ta a. Hetah hian i thil leina receipt chu a lo lang ṭhin. He receipt hi trade book chu a ni. Receipt chipchiar taka inziahna 'Contract Note' an tih chu i email-ah i dawng bawk ang; kan la sawi chho zel ang a, tun atan chuan trade book chu terminal-a i stock lei leh hralhna zawng zawng inziahna receipt a ni tih hi lo chhinchhiah la.

Tichuan order book chuan i order siamte chu kimchang takin a lo chhinchhiah fel thlap a. Trading terminal chung ber tlara Orders tih aṭangin en theih a ni.

Order book ṭangkaina ṭhenkhatte chu:

• I order siam endik nan -- order zat (quantity), a man (price), order type leh product type.

• Order siam ṭhat nan -- Entir nan, i buy order form-a stock i lei duhna man chu 261 atangin 259-ah i thlak duh a. I order tihhlawhtlin a la nih loh chuan siam danglam leh theih a ni.

• Order status (dinhmun) check nan -- Status-ah chuan order thenkhat chauh tihpuitlin a la nih chuan open tih a inziak ang a, order a hlawhtlin vek chuan status-ah complete tih a inziak ang; order chu hnawl a nih chuan reject tih a inziak ang. Hnawl a nih chhan chu chiang takin order book-ah tar lan a ni bawk ang.

A hnuaia mi hi i en chuan ITC share pakhat ₹261-a lei turin open order (order kal lai mek) a awm a. He order kal mek zawnah hian i cursor i dah chuan order siam ṭhatna tur (modify) te, cancel-na tur te a lo lang ang.

'Modify' tih hi i hmeh chuan i order form kha a rawn lang ang a, thlak danglam ngaite chu i siam ṭha thei ang.

Order chu kalpui a niha, i trade chu a tihhlawhtlin a nih chuan i share leina report kimchang chu trade book-ah en theihin a awm ang. Order book hnuai chiahah trade book chu a awm ang.

Hei hi kan trade book chu a lo ni ta a:

Trade book aṭang hian he trading account neitu hian ITC share 1 chu ₹262.2-a lei turin buy order a siam tih kan hmu a. Tin, he indawrnaah hian exchange order number bik pek a ni bawk tih kan hmu thei awm e.

Tihian kan hna hmasa zawk chu kan zo ta!

Tunah chuan ITC share 1 kan kawl ve ta rân mai. He share hi i hralh leh hma loh chuan i DEMAT account-ah a awm ang.

Kan hna pahnihnaah chuan Infosys man chet vel dan kan en dawn a ni. Kan hna hmasa ber atan Infosys chu market watch-ah kan dah lut leh ang. Search bar-ah Infosys kan chhu lut ang a.

Market watch-a dah tur chuan INFY tih zawn pheia '+' symbol kha kan hmet ang.

Kan market watch-ah chuan stock pahnih -- INFY leh ITC a awm ta a. Tihian Infosys man che mek chu kan chhui thei tawh a ni. A chunga mi khi kan en chuan Infosys share man thar ber (LTP) chu ₹1014.20 a ni a, previous day's close (₹1015.85) nena a inthlauhna hi -0.16% a ni. Market hawn tirha Infosys share man (open price) chu ₹1014.80 a ni a, share man hniam lai berin ₹998.40 a ni a, a san lai berin ₹1028.95 a hawlh kai a ni. Hemi nia Infosys share lei leh hralh zawng zawng belh khawm hi 3.6 million a ni.

Kan hriat reng tur chu Infosys share man kan en lai hian market a la inhawn avangin share man a chet chhung chuan share man san lai ber leh hniam lai ber hi la danglam thei reng a ni; open price erawh ₹1014.80-ah a awm reng thung ang. Entir nan, Infosys hi ₹1014.2 atangin ₹1050-ah lo chho ta se, a man san lai ber chhinchhiah tawh (1028.95) kha 1050 hian a rawn thlak ang a, high price thar a awm tawh ang.

A hnuaia mi hi kan en chuan Infosys LTP hi a hring a, ITC hi a sen thung. A hring hian LTP (share man thar ber) chu previous day's close (a hma nia share close price) aiin a sang tih a entir a, a sen hian previous day's close aiin LTP chu a hniam tih a entir thung.

He thu ziah a nih lai hian Infosys man hi 1014.20 (previous day's close aiin a hniam) aṭangin 1020.80 (previous day's close aiin a sang) ah a chho a, a rawng hi a sen aṭangin a hringah a rawn inthlak a ni.

LTP te, OHLC leh volume chungchangte kan sawi nual tawh a. Heng bakah hian market depth chhunga hmanraw pawimawh pakhat, market kal mek laia hna thawk ṭhin; rawng pawl leh rawng sena number intlar thla, Bid leh Offer price kan tihte hi ngun deuh takin i han thlirho leh teh ang.

Bid leh Offer Price

Share i lei duh chuan share hralhtu (seller) hnen aṭangin i lei a ṭul a. Share hralhtu chuan âwm a tih zatin share man chu a chhiar ṭhin; share man a chhiar zat chu 'Offer Price' tih a ni. Offer price chu a sen (red) a thai lan a ni a, chipchiar zawkin han zir dawn ila.

Sl No	Offer Price	Offer Quantity	Number of Sellers
01	3294.80	2	2
02	3294.85	4	2
03	3295.00	8	2
04	3296.20	25	1
05	3296.25	5	1

Market depth chhungah hian bid leh offer price ṭha zual pangate chu tar lan ṭhin an ni a. A chung table-a kan hmuh hi offer price ṭha zual pangate an ni. Share hralhtuin a hralh phalna zat man tlawm ber aṭanga tar lan ṭhin a ni.

Offer price zinga a chung bera awm hi ₹3294.80 a ni a. Tun hunah chuan he offer price hi stock man tlawm ber a ni rih; heti zat mana share hralh tur awm zat hi 2 chauh a ni a, seller pahnih an awm bawk (seller pahnihte hian share 1 ve ve an zuar a ni). Offer price ṭha ber pahnihna chu ₹3294.85 a ni; heti zat manah hian seller pahnihin share 4 an zuar mek a ni. Offer price ṭha ber pathumna chu ₹3295 a ni a; heti zat manah hian seller pahnihin share 8 an zuar mek bawk. Chutiang zelin palina leh pangana thlengin a awm a.

Kan hmuh ang khian share man a tam poh leh table-a a dinhmun chu a hniam telh telh a ni. Panganaa awm khian share 5 chu ₹3296.25-in a zuar a. Hei hi a chhan chu a share man chhiar aia tlawm zawk share man dang pali a awm vang a ni. Stock exchange-ah chuan share man chhiar tlawm apiang ngaih pawimawh an ni.

Tin, ₹3294.8-ah hian share 10 pawh lei duh mah la, hemi zatah hian share 2 chauh hralh tur a awm avangin share 2 chauh i lei thei ang. Amaherawhchu, limit price bituk kher lovin market order i siam thei thung. Share 10 lei turin market order i siam chuan hetiang hian a kal ang --

• Share 2 chu ₹3294.8 in lei a ni ang.

• Share 4 chu ₹3294.85 in lei a ni ang.

• Share 4 dang leh chu ₹3295.00 in lei a ni ang.

Heng share 10-te hi man chi hrang pathumin lei an ni ang. Chutih rual chuan, Infosys LTP chu ₹3294.8 aṭangin ₹3295-ah a chho bawk ang.

Share i hralh duh a nih chuan, i hnen aṭanga lei duhtu an awm a ngai a. Share lei duhtu chuan a man âwm tâwk nia a hriat zâtin share chu a lei ṭhin. Share lei duhtu inhuamna zat hi 'Bid Price' an ti. Bid price chu a pawl (blue) in an tar lang ṭhin.

Sl No	Bid Price	Bid Quantity	Number of Buyers
01	3294.75	10	5
02	3294.20	6	1
03	3294.15	1	1
04	3293.85	6	1
05	3293.75	125	1

Offer price ang bawkin market depth-ah hian bid price sang ber pangate chu tar lan an ni. A leituin share leina atana pawisa pek a inhuamna zat sang ber aṭanga tar lan ṭhin a ni. Table khi i en chuan share i hralh theihna man sang ber chu ₹3294.75 a ni a; heti zat manah hian lei duhtu mi panga-in share 10 an duh avangin share 10 chauh i hralh thei thung.

Market price-in share 20 lo hralh dawn ta la, a hnuaia mi ang hi i kalpui dan tur chu a ni ang:

• Share 10 chu ₹3294.75 in i hralh ang.

• Share 6 chu ₹3294.20 in i hralh ang.

• Share 1 chu ₹3294.15 in i hralh ang.

• Share 3 chu ₹3293.85 in i hralh ang.

A khaikhawm nan bid leh offer price chuan share lei duh (lei duhna zat man to ber aṭangin) leh hralh duhte (share chhiar man tlawm ber aṭangin) zinga a tha zual pangate chu an lo tlar thla ṭhin a. Share leitu leh hralhtute indawr dan kalhmang hi a bik takin intraday trader (stock lei ni la laa hralh leh ṭhinte) tan a pawimawh lehzual a ni.

Dan naranin bid-offer ah hian a ṭha zual pangate chauh tar lan ṭhin ni mah se, 20-depth window kan en chuan heng bids leh offers 5 bakah hian a dang 15-te chu en theihin a awm bawk. 20 market depth chungchang hi chipchiar takin 'Stock Market A Aw B' chhunga kan zirlai tâwp berah kan hrut leh ang.

A khârna

Trading terminal chu stock market luhka a ni a. A chhungah chuan trader-te hnathawhnaa puitu turin hmanraw ṭangkai tak tak a awm a. Chungte chu kan hre bel nual tawh a, bung thar kan kai huna kan la hmelhriat chhoh zel tur dang tam tak pawh a la awm âwm e. He kan zirlai bik aṭang hian market watch hnawh khah dan te, stocks-a transaction tih dan te (lei leh hralh dan), order book leh trade book en dan te leh market depth window chungchang te kan hriat belh bawk âwm e.

A tawp berah chuan -- trading terminal hi a hmangtute tana en nuam leh hahdam, hman awlsam bawk si a nih theih dan tihchangtlun reng a ni a. Tun aṭanga kum tam a liam leh chuan a hmelhmang pawh a lo danglam tawh mai thei; amaherawhchu, kan zir tâk zawng zawng - order book te, trade book te, SL te, limit order leh a dangte hi a bulṭhut chu a ngai reng a, a awmzia leh hman dante hi a danglam ve lo a ni tih kan hre reng dawn nia.

He zirlai aṭanga kan zir chhuah ṭhenkhat te:

1. Trading terminal chu stock market luhka a ni a. Hun puma trader hna thawh tum tan chuan trading terminal hman dan leh a thawh dan te chiang taka hriat tur a ni.

2. I stocks zir chian duh bikte chu market watch-ah dahin awlsam takin an chet dan i chhui zung zung thei.

3. Market watch aṭanga kan hriat theih thil pawimawh ṭhenkhatte chu -- LTP, % change, OHLC leh volume te.

4. Stock i lei dawn chuan 'B' i hmet ang a, buy order form a rawn lang ang. Chutiang bawkin stock i hralh dawn chuan 'S' i hmet ang a, sell order form a rawn lang ang.

5. Share i lei dawnin, i leina tura i inhuam zat share man bituk sa i neih chuan limit order type i thlang ang; market price-a i lei dawn chuan market order i thlang thung ang.

6. I share lei tur chu ni/thla/kum eng emaw zat kawl i tum chuan product type-ah CNC i thlang ang. Intraday-a trade i tum chuan MIS i thlang thung ang.

7. Order book chuan i order chu order kal lai mek (open order) emaw, order hlawhtling tawh (completed order) emaw, order hnawl (rejected order) a nih leh nih loh te a tar lang ṭhin. Order book tâwp lama 'Modify' button hmetin order kal lai mekte (open orders) chu i siam ṭha (modify) thei bawk.

8. Trade book chuan order hlawhtling tawhte chungchang kimchang takin a lo vawng ṭhin. Market order i siam a nih chuan i stock leina man zat chiah chu trade book aṭangin en mai theih a ni.

9. Market watch atangin bids leh offer price-te chu en theih a ni.

10. Bid leh offer price chu share i lei leh hralh theihna man te an ni. Market depth-ah hian bid leh offer price ṭha zual 5-te chu tar lan ṭhin a ni.

Support Robawm:

Account hawn dan