Hriattur pawimawh – 20 market depth/level 3 data
20 Market Depth (level 3 data) Window
Car kan lei thar hian a engine hi chu a inang tlâng viau zel a, mahse a chhûng awm dante leh a hmelhmangte erawh a danglam ve reng thung. Thâwkkhat lai kha chuan car chhunga air conditioner awm te, power steering leh power window-te hi car changkang leh man to chia awm tur bikah kan ngai ṭhin a, tunlai car chhuak tharah erawh chuan hengte hi kan hmu ta fur a, air conditioner awm lohna car phei chu kan lei tawh mang lo tluk a ni. Heng car features zinga ṭha an tih leh an ṭangkaipui em em pakhat chu parking assist hi a ni. Car hnunglama camera te tak tê invuah aṭang chuan kan park-na tur chin area chu kan hmu thei vek a. Lirthei kan park dawnin harsa taka dâk chhuaka hnunglam hawi zuk zuk chunga park a ngai tawh lo va, passenger-te lirthei aṭanga chhuktîra kan park-na tur min lo kawhhmuh tura tihbuai an ngai tawh lo bawk. Parking assist chuan awlsam taka car kan park theihna turin min pui tawh a ni.
Hetiang bawk hian level 3 data hmanga market-a kan trade hian min pui em em a ni.
Level 3 emaw 20 market depth hi trading terminal-a hmanraw pakhat, ṭangkaina tam tak nei a ni a. Organisation lian hnuaia stock tam tham tak trade ṭhin i nih chuan level 3 market window hi i hmelhriat tawhin a rinawm. Retail trader pangngai chuan he hmanraw ṭangkaina hi an hre lutuk lo mai thei. A chhan chu Zerodha-in India ram retail trader-te hman theih tura a chhawp chhuah hma kum tam tak chhung chu he feature hi retail trader-te tan a awm ngai lo a ni.
He zirlai hian level 3 data chu eng tiang taka ṭangkai nge a nih tih leh level 3 data hmanga trading strategy siam dante chu min zirtir a tum ber a ni.
Contract awm remchan dan
Option trader tân chuan 20-depth order book hian contract trade tur awm dan leh a awm zatte a hriattir bakah an price hrang hranga trade a nihna a tar lang a. Hemi tel lo hi chuan a bikin illiquid contract (buyer leh seller nei tlem contract-te) chu trade a harsa ṭhin hle. Options bik kan sawi rualin Futures contract-ho, a bikin illiquid contract-te pawh hetah hian kan sawi lût thei âwm e.
Jan 2020-a 13000 CE regular market depth (i.e. best 5 bid-ask) hi han en hmasa ila –
Quantity khi kan en chuan bid aiin offer a tam deuh tih kan hmu thei awm e. Nifty lot eng emaw zat trade duh tan chuan he contract-a trade lâk hi a phûrawm tehchiam lo ang.
Mahse, View 20 depth khi hmetin level 3 data rawn lang hi han en leh teh –
Kan hmuh ang khian contract tam tak, regular market depth-a rawn lang lo ho kha an rawn lang thla ta tuarh a. Tlar 9-na aṭanga kan en thlâk zel chuan bid leh offer quantity tam deuhna pawh a lo awm nual mai.
He strike-a contract awm dan aṭang hian trade lak tur leh lak loh tur chungchanga thuthlûkna chu i trading strategy-ah a innghat tawh dawn a ni.
Execution control
Level 3 data hian i trade-na tur man zat bâwr vel chu chiang takin a rawn tar lang a. Market scalp duh tan chuan hei hi thil ṭangkai tak a ni. Market-a i scalp chuan –
- Vawi khatah share tam tham tak i trade ṭhin a. Second emaw, minute reilote chhungin price move tereuhtê ah (share pakhatah ₹1/- lek te hlêp turin) stock chu i leiin i hralh zung zung a ni.
- Stock scalp hian rang taka chet zung zung a ngaih avangin market order chauh siam ṭhin a ni.
Hindustan Zinc share 5000 chu leia hralh leh i duh ta a, regular market depth window chuan a hnuaia information hi a pe ang che –
Kan hmuh ang khian offer quantity kan en chuan share offer zat chuan 5000 a tlin zo lo. Amaherawhchu, 20 depth window kan en leh chuan –
20 depth window chu a dang ta daih mai. Hindustan Zinc share 5000 lei tur a awm tih min hriattir mai bakah, ka leina tur man zât bâwr vel pawh a rawn tar lang tel bawk. Share 5000 lei tur hian market order siam ta ila, 210.5 aṭanga 211.25 price point thleng khian he order book hi ka lei dawn tihna a ni. Tin, 211 khi kan en chuan khi price point-ah khian share 2425 lei tur a awm a, chuvangin a tlângpuia chhûta share ka leina man tur chu 211 velah kan ngai thei ang.
211 emaw, 211.5 chunglama ka profit theih dan azirin stock chu ka scalp tawh mai dawn a ni. Trading charges hrang hrang i chawi hnua a breakeven-na (zero profit, zero loss) chu brokerage calculator hmangin i chhût thei bawk ang.
Position sizing
Level 3 market window hi buyer leh seller tam dan azira share kan trade theih zat tur chhûtna kawngah a ṭangkai em em a. A sawi fiah nan a hnuaia regular market depth hi han en ta ila –
Siemens share hi darkar rei vak lo hnuah 1675 aṭangin 1690 bawr velah a chhoh ka lo ring ta a. Sumlu-ah buaina nei miah lo ta ila, he intraday trade atan hian share eng zat nge ka lei ang?
Regular market depth-a kan en chuan share 175 dâwn ka lei thei tih kan hmu thei âwm e. Mahse, 20 depth hi han leh ila –
Best 5 bid and ask hnuai lamah hian stock lei leh hralh tur tam tak a lo lang a, an impact cost (Bid leh Offer inkar zau lutukina luh/chhuahna price chhe tak min pek) pawh a ziaawm hle. Regular market depth chuan he information hi min pe ve lo a ni. Share 1500 vel lei i tum chuan i leina man (buy price) tur chu 1675.5 leh 1678 inkar vel a ni ang a, bid-ask spread chu 0.149% a ni ang.
Kan target price (1690) ah a chho ngei dawn tih kan chiang a nih chuan he order book hi kan lei vek thei a ni.
Order placement
Position sizing ang bawkin 20 depth market watch hi hmang ṭangkaiin stop loss emaw limit order siam nan kan hmang thei bawk. Entir nan, VST Tillers-ah hian 1313.8-ah intraday buy position i la a.
Zawhna awm thei ta chu khawiah nge stop loss kan siam ang? 20 market depth hian he trade-ah hian min pui thei ang em?
Thei tehreng mai. VST Tillers 20 depth window kan en chuan 1290-ah bid quantity a tam deuh bik a; tin, he order book-ah hian order count tam berna (35) a ni bawk, hei hi thil lawmawm a ni.
Hei hian a entir chu, trader eng emaw zatin 1290-ah hian order an siam a, chuvangin 1290-ah hian price action (share man chetna) kan hmuh ngei a rinawm. Tihian kan stop-loss siamna tur chu kan hrethiam ruak âwm e.
Trader fing chuan 1290-ah hian stoploss dah mai lovin, a hnuai hretah emaw a dah ngei a rinawm bawk.
He stock-ah hian buyer ka nih angin 20-depth aṭanga ka thlirna hmangin SL chu 1290 emaw a aia hniam hret, 1287 velah ka dah ang a; chutiang bawkin ka target (hralhna tur) chu 1340 emaw 1338.8-ah ka dah bawk ang.
Support & Resistance level
A chunga entirna kan pekah khan 1290-ah bids a awm khâwm deuh bik avangin 1290 chu kan stoploss price-ah kan dah ta a ni a. Ṭawngkam dang chuan 1290 hi support price a nih kan beisei tihna a ni.
He kan beisei ang hi a dik ngei a nih chuan chart-ah pawh a rawn lang ngei tur a ni. Han en ta ila –
1296 bawr velah price action chu kan hmu ta ngei a. Kan hriat reng tur chu support leh resistance hian price point pakhat a kâwk bik lo va, huam chin (price range) nei a ni zawk a ni. Chuvangin 1290-1300 hi he stock atana kan intraday support chu a lo ni ta a ni.
Hetiang lo pawh hian, chart-ah S&R level en hmasa phawtin, chumi range-ah chuan bid/offer tam leh tam loh hre turin 20 depth kan en leh thei bawk.
Tunah chuan 20 depth order book pawimawhna leh trader tana a hlutzia chu kan hrethiam tlângin kan ngaihhlut sawt ka beisei.
Thlirna fel fai tak siam nan eng hmanrua pawh hmang ila, technical emaw quantitative analysis pawh ni se, share man (price) leh chumi mana trader-in chêt a lâk dânah a hlawhtlinna chu a innghat ber a ni tih hi hre tel bawk ila. He 20 depth market window hi price action tifiah/tichiang tura hmanraw ṭangkai ber a ni kan ti thei âwm e.
Investment leh trading zinkawng bulṭan ve rawh le (click rawh)
