Stock Market tawngkam bungraw hman lar zualte

He zirlaiah hian stock market-a tawngkam kan hman thenkhatte leh an hman dante kan thlirho dawn a ni.

Bull Market (Bullish) – Stock man sang tura i beisei chuan stock manah i bullish tihna a ni. Zau zawka thlirin hun eng emawti chhung atana stock market index a sang chho zel a nih chuan bull market tia sawi a ni. Entirna – 2020 kum laihawl atanga 2022 kum tir thleng khan stock market chu a bullish a ni.
Bear Market (Bearish) - Stock man tla hniam tura i beisei chuan stock manah i bearish tihna a ni. Zau zawka thlirin hun eng emawti chhung atana stock market index a tlak chuan bear market tia sawi a ni. Entirna – 2008 kum chawhma lam atanga 2009 kum chawhnu lam thleng khan stock market chu a bearish a ni.
Trend – ‘Trend’ kan tih hian market hawi lam leh a kal chak dan a kawk tlangpui. Entir nan, market a tlak hniam chak viau chuan market trend chu a bearish a ni. Market chu a chhuk emaw, chho zawng emawa kal lovin, a phei zawnga a kal char char a nih chuan market trend chu sideways an ti thung.
Stock face value – Face value (FV), par value an tih bawk hian share nominal value a entir. Corporate action hrang hrang – stock split, dividend leh bonus sem a nih dawn hian Face value aṭanga chhût ṭhin a ni a, a pawimawh hle a ni. Entir nan, Infosys FV chu 5 a lo ni ta a. Kum khata an dividend sem chu ₹63/- a nih chuan dividend an pek chhuah chu share pakhatah 12.6% zel a ni (63÷5). Corporate action chungchang hi bung hrangah kan la thlirho dawn nia.
52-week high/low – 52-week high chu kar 52 liam taa (kum 1 pumhlûm) stock hlutnain a hawlh san ber ṭum a ni a; chutiang bawkin 52-week low chuan kar 52 liam taa stock hlutna hniam ber ṭum a kawk a ni. 52-week high/low atang hian kum 1 chhunga stock man tlângpui kan hre thei a ni. Trader tam tak chuan stock manin 52-week high a han hawlh hian bullish trend an hmu thuai dawn tih entirnaah an ngai. Chutiang bawkin stock-in 52-week low a thlen chuan bearish trend an hmu dawn tih entirnaah an ngai bawk.
All-time high/low – 52-week high/low nen an inang hle. A danglamna chu a hun chhûng (time period) ah a ni. All-time high price chu stock an list aṭanga tun hun thlenga a hlutna san ber ṭum a ni a. All-time low price chu stock an list aṭanga tun hun thlenga a hlutna hniam ber ṭum a ni.
Upper leh Lower Circuit – Exchange chuan price band bitukin chumi inkarah chuan ni khatah stock chu an trade ṭhin. Ni khata stock hlutna san theih lai ber chu upper circuit limit tih a ni a, a hlutna hniam theih lai ber chu lower circuit limit an ti. Exchange chuan tehkhawng siamin chumi hmang chuan upper leh lower circuit limit chu 2%, 5%, 10% emaw 20% ah te a bituk ṭhin a ni. Company-in chanchin thar a neihin chumi vanga stock man che nasa lutuk tur venna atan exchange chuan he khuahkhirhna hi a siam a ni. Exchange chuan derivatives stocks (leh index) tân khuahkhirhna hranpa a siam bawk a, hemi chungchang hi hun dangah kan la sawi chhunzawm ang.
Long Position – Long position i lak hian i trade dan kalhmang a kawk a ni. Entir nan, Biocon shares i lei emaw, lei i tum chuan Biocon-ah long position i la emaw, lak i tum tihna a ni. Nifty Index hlutna a chhoh ringin i lei a nih chuan Nifty-ah long position i la tihna a ni. Stock emaw, index-a long position i lak chuan i bullish tihna a ni.

Short Position – ‘Shorting’ tih hi share lei leh hralh dan chikhat, kalphung bik nei kan hman dawna kan thumal hman ṭhin a ni. Shorting kalhmang hi tawi tea sawi fiah a harsat deuh avangin 2014 kum laihawla kan hnathawhnaa thil thleng hmangin entirna ka rawn pe dawn a ni.

Gadget ngaina mi i nih chuan kum 2014-a Xiaomi (Smartphone siamtu Chinese company) leh Flipkart ṭang kawpin India ramah an flagship smartphone Mi3 hralh turin thawh dunna an siam kha i hre ngei ang. Chutih laia Mi3 man chu ₹14,000/- vel ni tura rin a ni. Miin Mi3 a lei duh chuan Flipkart-ah a in-register a ngai a, in-register ve lo tân lei theih a ni lo. Registration pawh chu hun reilote chhung chauh hawn a ni. Phone lei tur chuan ka in-register vat a, ka thawhpui Rajesh erawh a in-register ve hman lo thung. Phone chu lei duh hle mah se, a hun laia a in-register loh avangin a lei thei lo a ni.

A phone lei duh si chu ka hnenah rawn kalin rawtna a siam ta a. Phone chu ka hnen aṭangin ₹16,500/- in lei a inhuam a ni. Trader ka ni bawk a, ihe lovin ka lo remti ve nghal mai a. Pawisa pawh chu min pe lâwk turin kan inremsiam bawk a.

Phone man ka dawn hnu chuan, “Eng thil nge ka tih tâk mai? Eng dinhmunah nge ka inbarh luh tâk mai hi? Rajesh-a hnenah ka ta pawh la ni lo phone chu ka hralh dêr mai si a,” tiin ka inngaihtuah a.

Mahse, thil pawi lutuk a ni hran lo ve. Ka ta la ni lo phone chu ka hralh ngei mai; amaherawhchu, Flipkart-ah phone chu ka lei ang a, a bawm la hawn loh, la thar hlak chu Rajesh-a hnenah ka pe mai dawn a ni tiin ka ngaihtuah leh ta zawk a. He kan indawrnaa ka hlauhthawn ber chu – Phone man chu ₹16,500 aiin lo to ta si se – tih chu a ni. Chutiang a nih vaih chuan ka pawisa chu ka chân ang a, inremsiamna ka lo neihpui ta chu ka inchhir hle dawn a ni. Entir nan, phone chu ₹18,000 man a nih chuan ₹1,500 ka chân dawn tihna a ni (18000 – 16500).

Vanneihthlak takin ka beisei ang ngeiin phone chu ₹14,000/- an chhiar ta hlauh a. Flipkart aṭang chuan ka lei vat a, a rawn thlen veleh Rajesh-a hnenah ka pe a. Kan indawrna aṭang hian hlawkna ₹2,500/- ka hmu a ni (16500 – 14000).

Kan indawrna kal dan hi i en chuan, phone (ka ta pawh la ni miah lo chu) Rajesh-a hnenah ka hralh lâwk a, a hnuah Flipkart aṭanga chahin Rajesh-a ka pe a ni. Ka hralh hmasa a, a hnuah ka lei chauh a nih chu!

Hetianga indawrna hi ‘Short Trade’ an ti ṭhin.

Kan nitin nunah ‘shorting’ kalphung hi kan hmang ngai meuh lo va, chuvangin trader rilru ang pu mi kan ni te a nih loh chuan a kalhmang hi mi nawlpui tan hriatthiam mai a harsa ve deuh ṭhin.

Stock market lamah bawk khan han kir leh ta ila, indawrna tluangtlam deuh tak tihian han ngaihtuah teh ang – Ni 1-na ah Wipro share chu ₹405-in i lei a; ni hnih hnuah (ni 3-na) stock hlutna a rawn chho a, share chu ₹425-in i hralh a. Heta ṭanga hlawkna i hmuh chu ₹20/- a ni.

He indawrnaah hian a thawh khatna chu Wipro share ₹405-a lei a ni a, a thawh hnihna chu Wipro share ₹425-a hralh leh a ni. He stock-ah hian i bullish a ni.

A ni 4-naah chuan stock chu ₹425-ah trade a ni a, ₹405-ah a tla thla leh ngei dawnin i ring a, stock-ah chuan i bearish a ni. Stock hlutna tla hniam tura i rinna chu hmang ṭangkaiin hlawkna siam theih a ni ang em? A theih ngei a, chu chu shorting hmangin a tih theih a ni.

Tichuan, stock chu ₹425 in i hralh tawh kha a ni a; ni hnih a ral leh chuan i rin ang ngeiin a hlutna chu ₹405-ah a tla thla ta ngei a, i lei leh ta a ni.

He indawrnaah hian a thawh khatna chu ₹425-a Wipro stock hralh a ni a, a thawh hnihna chu ₹405-a lei leh a ni. Hei hi shorting kan kalpui chuan thil awm dan ngei ngei a ni – man to zawkin stock chu kan hralh ang a, kan hralhna aia tlawmin kan lei leh ṭhin ang.

Indawrna hmasa zawk kan sawi tâkah khan Wipro stock kha ₹405-in i lei a, ₹425-in i hralh leh ang chiah kha indawrna hnuhnung zawka i chet dan hi a ni a, a lêt zawngin i kalpui mai a ni.

Zawhna awm thei pakhat chu – Engtin nge miin a neih pawh ni hauh lo Wipro share chu a hralh theih? Ka neih miah loh phone ka hralh ang chiah khan shorting hmangin stock market-ah Wipro share chu ka hralh ve thei a ni. Hriat tur pawimawh tak chu stock i short hian, chumi ni vêka market an khar hma ngeiin stock chu i lei leh ngei tur a ni. Derivatives segment aṭang hian i stock short chu ni eng emaw zat kawl turin position i la ve thei bawk a. Mahse, tun atan chuan derivatives lam chu dah ṭha rih ila, stock chungchanga short position kan lak reng reng (cash segment an ti bawk) chu a ni ngaiah, market inkhar hma ngeiin khar fel vek tur a ni tih hriatthiam hmasak hi a pawimawh a ni. A tihchian nan thu dang han zep leh hram ila, cash market-a short position lak hi intraday (chumi ni vek) bikah chauh a theih a ni.

A khaikhawm nan –

Stock i short hian stock-ah i bearish a ni. Stock man a tlak chuan hlawkna i hmu ang. Stock i short hnuah a hlutna a chhoh leh si chuan i hloh thung ang.
Derivatives hmanga i short a nih loh chuan stock i short ni vêkin, market inkhar hmain stock chu i lei leh ngei tur a ni.
Stock shorting tih dan chu – i stock short duh kha i thlang ang a, ‘sell’ tih kha hmeh mai tur a ni.

Long leh Short Position khaikhawmna –

Position	Thawh khatna	Thawh hnihna	I rin dan	Hlep theihna	Hloh theihna
Long	Buy	Sell	Bullish	Stock man a chhohin	Stock man a tlakin
Short	Sell	Buy	Bearish	Stock man a tlakin	Stock man a chhohin

Kan thupui ber, stock market ṭawngkam bungraw hrang hrangah khan lêt leh ta ila.

Square off – Kan position lak mek kan khar dawnin square off tih ṭawngkam hi hman ṭhin a ni. Stock pakhatah long position i lo la ta a, i square off chuan i stock neih lai chu i hralh tihna a ni. Long position i khar hian stock chu i hralh a ngai tih hriat reng tur a ni. He hralhna hi short position anga chhiar a ni lo. I stock lei aṭanga long position i lak tawh kharna mai a ni.

Stock i short a, i position i square off chuan stock chu i lei leh (repurchase) tihna a ni thung. I lei leh hian i position lak sa (short position) chu i khar mai a ni, long position i la tihna a ni lo.

Position Square off position

Long Stock i hralh

Short Stock i lei
Intraday position – Trading position i lakin, chumi ni vêka i square off chu intraday position tih a ni. Entir nan, stock-a short position zawng zawng hi intraday position a ni.
OHLC – Stock man tar lannaah kan hmu ṭhin a; OHLC chu Open, High, Low leh Close tihna a ni. Technical Analysis lamah chiang zawkin kan la zir ang a. Tun atana kan hriat tur chu:

Open – Ni khat chhung atana market inhawn tirha stock man

High – Ni khat chhunga stock man san lai ber

Low – Ni khat chhunga stock man hniam lai ber

Close – Ni khat chhung atana market inkhar dawna stock man

Entir nan, 3 September 2026-a ACC-te OHLC chu 1269, 1280, 1268 leh 1277 a ni.
Volume – Volume-in stock mana nghawng a neih dan hi thil pawimawh tak kan hriat ṭul a ni a, technical analysis lamah chipchiar zawkin kan la zir ang a. Volume chuan ni khat chhunga stock pakhata transaction tih zawng zawng (share lei leh hralh zat belh khawm) a tarlang ṭhin. Entir nan, 3 September 2026-a ACC volume (ACC share lei leh hralh zawng zawng belh khawm) chu 93,466 shares a ni.
Market Segment – Stock market chhunga sum siamna hmanraw hrang hrangte (financial instruments) chu hlâwm hrang hrangah ṭhen an ni a. Chûng sum siamna hmanraw hrang hrangte chuan risk leh reward hrang ṭheuh an nei a ni. Financial instrument-te hi stock exchange-ah hian hlâwm lian pui pui pathumah ṭhen an ni:
- Capital Market (CM) – Capital market segment-ah hian lei leh hralh mai theih hmanraw hrang hrang - stocks te, exchange-traded funds (ETFs) kan tihte hi an awm a. Chumi awmzia chu company share i lei leh i hralh hian capital market chhungah hna i thawk tihna a ni. Stocks shorting kan tihte pawh kha capital market segment hnuaia awm a ni. Cash market hi spot market tiin an sawi ṭhin bawk.
- Futures and Options (FO) – Equity derivative segment tia an sawi bawk Futures and Options-ah hian leveraged products an trade ṭhin a. Derivative market chungchang hi Derivatives (Futures and Options) thupui lamah kimchang takin kan la zirho dawn a ni.
- Currency Derivatives (CDS) – CDS segment-ah hian currency-te chu a inkawp zelin trade ṭhin a ni, hetiangin – USD INR, EUR INR, JPY INR. Futures and Options hmangin trade hi kalpui a ni a, chuvangin a hming pawh hi currency derivative market tih a ni.
- Wholesale Debt Market (WDM) – Wholesale debt market hnuaiah hian fixed-income securities ho an awm a. Debt instruments hian government securities te, treasury bill te, public sector undertaking-in bond a tihchhuah te, corporate bonds te, corporate debentures leh a dangte a huam a ni.

Hengte hi market ṭawngkam hman lar tak tak an ni a. Heng bakah hian ṭawngkam hman lar dang tam tak a awm thei a; tin, kan han sawi tak aṭanga hriatthiam loh emaw hriat belh duhte pawh a awm thei ang. Chungte chu kan rawn la sawifiah zel ang.

Support Robawm:

Account hawn dan