Thlir dan thar: Trading aṭangin Portfolio Management-ah

Trader leh portfolio manager hian zawhna hrang hlak an zawt ṭhin

I lo swing trade tawh ṭhin a nih chuan hei hi a chiang awm e: ṭum khatah trade 1 emaw, a tam pawlah 5 emaw chiah i rilruah a awm ṭhin ang. Hei hi setup ṭha a ni em? Khawiah nge entry ka lak ang? Khawiah nge ka stop-loss a awm ang? Khawiah nge ka target a awm ang? Trader i nih chuan heng zawhna te hi i ngaihven tur a ni reng a, zawhna dik leh ṭha lutuk vek a ni. Portfolio Manager vet hung chuan trade pahnih khat mal khelh hi a ti ve lo va. Trade a lak tam tak chu sava vana thlawk in a, a hu ho a min hmuh emaw en emaw ang hian a trade lak zawng zawng chu a en zawk a ṭhin a, a rilru chu hetiang lamah hian a kal zawk ṭhin a ni:

Asset ka kawl zawng zawngah hian risk engzat nge ka nei a, eng ang risk-te nge ka neih?
A chhe thei ang ber dawnin, lo dik lo hulhual ta i la, thawk leh khatah engzat nge ka chan theih?
Trade ka lak ho hian inkungkaihna sang tak a nei nge ni a, an inkungkaih lem lo?
Tuna ka kalphung hi felfai taka ziaka dah ka nei em? Nge ni a, ka phur dan emaw min turtu ka neih changin emaw thuthlukna ka siam ṭhin zawk?

Market in ang renga tal ho siin, trader leh portfolio manager rilru put hmang chu a danglam hle a ni. Trader chuan thingkung chu a mal malin a en ṭhin a, portfolio manager chuan thingkung chi hrang hrang awmkhawmna ram ngaw zawk a ngaihtuah ṭhin a ni. Chu ram ngaw chu thawk leh khatah a kang thut thei em tihte leh engtinnge a ven ang tih ngun takin a ngaihtuah ṭhin a ni.

Trade ṭha tak tak lak hi portfolio ṭha tihna a ni lo

Trader ṭha tak tak ten portfolio management an luhchilh a, thang an tawn hmasak ber ṭhin chu, trade ṭha lak hi portfolio management ṭha emaw tihna hi a ni awm e. Tehkhin thuah, Long (Lei hmasa zawngin) lama trade tur ṭha tak tak sawm hmu ta la. A chart awm dante, a fundamentals-te leh thil dang chu a ṭha tawk khawp mai a. Chung trade tur ṭha tak tak i hmuh sawm te chu i lei vek a. A lan danah chuan technicals tha bawk, fundamentals tha bawk chu che tha awm tak a ni a, stock pahnih khat mai ni lovin, stock sawm lai i lei bawk a, diversification chu a tha viau tur a ni. Chung stock sawm i lei atanga a tam zawk chu Information Technology stocks lo ni vek ta sela? A la ṭha tho em? I dinhmunah portfolio manager awm ta se chuan, heti hian zawhna a inzawt ang: Heng trade-te hi trade hrang theuh nge an ni a, trade hrang theuh anga lang amaherawh chu chik deuh chuan trade pakhat ang lek?

A chhanna chu, trade pakhat ang a ni. Trade i lak tam zawk kha IT stock anni a. IT sector chet ṭhat loh hunah khang stock sawm te kha a hu hovin a tla lamah an inzui thla dial dawn tihna a ni. Stock sawm i lei khan i risk chu stock sawmah i theh darhin i sem darh hauh lo, hmun khatah a la awm khawm dul zawk a ni. Chuvangin, stock sawmnga pawh kawl la, hun tam zawkah a hu hova an tlak dial dial chuan risk pakhat mah i sem darh lo hul hual tihna a ni. Chuvangin, diversification kan ti hlawhtling duh a nih chuan Asset inkungkaihna nei sang lo pahnih thum kawl hi a ṭha zawk a ni.

Tehfung inang lo

Trader chuan win rate (trade dik zat) leh a trade lak chawhrualin profit a siam em tihte hi an en nasa ṭhin khawp mai. Portfolio manager chuan hetiang hian a inteh thung:

A risk lak milin hlep a hmu leh hmuh loh a en ṭhin. Risk hi chhutchhuah theih thil a ni a, portfolio manager chuan, Ka risk lak zat ngaihtuah hian ka hlep hmuh hian a phu em? Tih a inzawt ṭhin a ni. Engzatnge a hlep tih chauh chhut lovin.
A sumlu neihzat a san lai ber aṭang engtiang anga na in nge a tlak tih a en uluk ṭhin hle bawk. Hei hi Drawdown an ti. Portfolio manager chuan he drawdown hi engtianga na nge tih leh, engtianga rei nge tih a zirchiangin, a dam khawchhuak thei ang em? Tihte a chik ṭhin a ni.
A kalphung hman lai mek chu ṭum dangah a ngai ang chiah chiahin a ti chhuak emaw, a ti nawn leh thei em? Nge ni a, vanneih thil thu vang chauha hlep nei a nih? Tih hmang ten a chet dan a inteh ngun ṭhin hle.

Multi-Asset pawimawhna

Portfolio Management kan zir hian stock chiah kan trade dawn lo va. Stocks piah lamah, Bonds, Commodities, leh Currency-te kan hmang vek dawn a ni. Thil chet dan inang lo leh inthurual lo a hu hova kan trade dawn a nih chuan Asset inang lo ṭhuau hi a ṭha ber a ni. Stocks, Bonds, leh Gold-te nawr kaltu hi a inang lo vek a. Thawk leh khatah an chho dial ngai lo va, an tla dial ngai lo bawk. Stock tam tak kawla chho dial, tla leh dial ṭhin ai chuan, asset hrang hrang kawl hi a thlanawmin enkawl a nuam zawk ngei ang. Tunah chuan heng abikin stocks, bonds leh commodity-a peipun dan hi thiam nghal a ngai rih lo va. Kan zirlai lo la awm zel turah kan zir thuk leh zual dawn a ni. Tun atan chuan hei hi i rilruah lo vawng rih phawt la: Asset class pakhat aia tam kawl hi diversification kan tih hnaih ber chu a ni, tih hi. Asset hmang lo pawh hian strategy-in diversification a tih theih. Mahse hemi kalphung hi ti ṭan tir tan chuan a harsa deuh hlek a, nakina sawiah kan dah ṭha rih ang.

Eng maw 'Portfolio' chu ni?

Portfolio hi (Book an ti bawk) asset i neih ho sawina a ni ngawt lo va. Portfolio chu position pakhat aia tam, thlirna pakhat leh tum pakhat nei rana, dan leh dun emaw kalphung felfai tak zawm chunga a hu hova enkawl hi a ni zawk. A chunga kan sawi aṭanga pawimawh chu, a hova enkawl tihte, tum pakhat nei tihte, dan leh dun leh kalphung felfai tihte hi an ni awm e. Trade i lak reng reng chu a mala i enkawl emaw, a hranpa a i enkawl leh vil bik deuh chawt a, tum mumal nei hranpa lem lo leh kalphung ziaka dah tel lo va i enkawl a nih chuan portfolio management tiin i chhal thei lo a ni. Portfolio Manager rilru kan put thiam a ngai dawn hle a ni.

Kalphung hi a pawimawh

Kan han zir chho zel anga, kan ngaih pawimawh ber tur chu kalphung nghet neih a ni awm e. Kan thil tih ṭhat dan zawng chu hlawkna min pek zat aṭanga teh ngawt lovin, kalphung kan zawm ṭhat dan azira teh a ni bawk ang. Hlawkna hmanga hlawhtlinna hi teh tur ni ta ila, hlawkna kan hmuh dan chu vanneih thilthu vang a ni thei a, vanneihna chuan rei a daih loh em avangin hlawkna ai mah chuan kalphung kan zawm ṭhat dan atanga teh hi thil tih chi zawk a ni awm e. Chuvangin thuthlukna i siam reng reng chu, i position sizing siam dan a zirte, i trade dan kalphung i zawm that leh that loh a zirte leh journaling i tih that dan a zir zela thuthlukna tha a nih leh nih loh teh tur a ni ang.

I lo tih ve turte:

Portfolio account in lo siam ve ang: Sumlu tak tak nei rih lo tan pawh a theih a, tradersos.peipung.com – ah hian inziah luh a, sum tak tak hmang lo va tih mai tur a ni ang. Sumlu nei lo va, paper (simulation) hmang turte tan chuan ₹1,00,000 account atang in tan ang. Sumlu neisa tan pawh tradersos.peipung.com - ah hian journaling a tih theih.
Tum felfai pakhat in ziak chhuak ang: Entir nan, "He portfolio/book hi tun Financial Year chhungin hmanhmawh miah lovin ka enkawl ang a, a san lai ber aṭang x% aia tam ka chan lo vang."
Journaling inti ang: Traders' OS-ah hian journaling a tih vek theih a, in lo zawm thlap thlap ang.
Reflect: In portfolio chu thla 2-3 a tlin hunah, in enlet ang a, in tih sual leh tih dik loh in en ang.

Portfolio i enkawl a nih chuan, trade i lakah chawi tlem i duh ngei ang, kan partner Zerodha-ah Delivery Trade hrim hrim chu a free a ni a, i investment portfolio enkawl nan lo hmang ve ta che