Skip to content

Call option lei chungchang

Zirlai hmasa lamah khan call option nihphung kan zir ho tawh a, call option leiin awmzia a neih hun te pawh kan sawi zau tawh a nih kha. Tunah chuan zirlai hmasa lama kan zir kha zau zawkin kan lut chilh leh anga, kan hriatthiamna a thuk leh zual nan kan zir leh ang a, call option lei leh hralh chungchang kan zir thuk leh ang. Kan ṭan hmain, kan zir tawhte i ennawn thuak thuak ang -

  1. Underlying asset man (spot price) a sang chho dawna i ngaih chauhin call option lei hian awmzia a nei.

  2. Underlying asset man chu a tlahniam zawngin emaw, a khamphei zawnga a awm chuan call option leitu in loss a nei ang.

  3. Call option leitu loss hnem theih ber chu option hralhtu hnena premium a pek zat kha a ni.

Heng pathumte hi hre reng chungin tunah Call option hrethiam leh zual turin i zir ṭan ang le.

Call option chu lei ni tase

Market-ah hian Call option leiin awmzia a neih chang hi a tam ve khawp mai. Tun hnaia thil thleng hmang hian entirna pek i tum chhin ang. A hnuaia chart hi han en ta la -

Infosys chart

Entir nana stock kan hman hi Infosys Limited a ni. I lo la hriat loh takin, Infy (Infosys) hi India rama IT stock lian ber pawl a ni. Chhan hrang hrang avangin tun hnaiah namen lovin a stock man hi a tla a, kum khat chhunga a hniam ber lai (52-Week Low) hnaihah a awm hial a ni. Trader ṭhenkhat chuan an lei ena an en loh laiin trader ṭhenkhatte chuan leina hun ṭha ah an ngai ve thung ang. A hnuhnung zawk trader-ah hian ka inchan anga, ngaihruat thuin trade ka lakna chhan turte chu -

  1. Infosys hi company hlun leh ṭha an ni a, Fundamental analysis thlirna aṭang chuan stock ṭha tak a ni.

  2. A stock man hi a tla nasa tawh hle a, India rama IT company-ten AI lamah ṭan an khawh nat tawk loh avangin, market hian na takin a nawr tla ah ka ngai a.

  3. AI thlipui tleh hi a reh hun a awm ka ring a, Infosys stock man pawh hi a rawn chhoh ve leh mai ka beisei a.

  4. Amaherawh chu, thil chiang a la awm lem loh avangin a la tla chhunzawm zel thei a, Infosys stock hi kawl (neih) rih ka duh lo va.

  5. Khitiangte anih avang khian Futures hmanga trade lak pawh ka duh ta lo va.

  6. Chutih rualin, company chhungrila thil inthlakin stock man hi nawr chho ta sela, tel ve hman ngei ka duh bawk si a.

A chunga ngaihruatthu kan sawi hi a tawi zawnga khaikhawm chuan - Infosys stock hi hmalam hunah a che ṭha dawn niin ka ngai tihna a ni awm e. Chutih rualin, tun huna a awm dan turah erawh thuthlukna ka siam thei lo tih a lang. A chhan chu tun aṭanga hun rei lutuk ni lem lo ka thlira Infosys stock man hi a tla chhunzawm a nih chuan loss tam tham tak min siam thei a ni. Sum chan theihna chance chu a awm tho rualin, a hniam viau thovin ka hria a. Thuthlukna siam harsa tak dinhmuna ka awm takah chuan eng nge ka tih tak ang le?

I han chik deuh chuan 'Call Options kalphung' tih zirlaia Sanga dinhmun ang chiah chiah kha tuna ka dinhmun hi a ni a, call option leitu a ṭan chu ka tih awm tak a lo ni ta. Kan sawi thui hmain, Infosys option chain hi i en lawk teh ang.

infosys option chain

Kan hmuh ang hian INFOSYS share pakhat man chu ₹1122.80 (box pawl) a ni a, hei hi Underlying/Spot price a ni bawk. Spot price hnaih ber strike price 1120 chu ka thlang ang a, ₹37.40 premium pein 29th September 2026 expiry call option contract chu ka lei dawn a ni. Spot price hnaih ber ka thlan chhan hi a awm a, nakinah kan la zir chho zel ang. Tunah rih chuan 1120 strike price thlan hi a fuh ber tiin i pawm phawt mai teh ang.

Intrinsic Value awmzia

Call option ka lei zawh chiah kha a expire nan ni 28 la awmah ngai ila, chumi chhung chuan eng nge thleng thei ang? Option zirlai pakhatna kha i chhiar tawh chuan, thil thleng thei pathum a awm tih i hre awm e. Chungte chu -

Thil thleng thei 1-na: Stock man chu kan strike price thlan aia sangah a awm thei, entir nan, 1150-ah.

Thil thleng thei 2-na: Stock man chu kan strike price thlan aia hniamah a awm thei, entir nan, 1060-ah.

Thil thleng thei 3-na: Stock man chu a inthlak danglam lova, 1120-ah a awm theih bawk.

Heng thil thleng thei 3-te leh zirlai pakhatnaa entirna kan pek kha a inzul zui hle a, Profit leh Loss a awm theig dan tur pawh i man thiam tawhin ka ring. Heng pathum hi ngaihtuah leh ta ila -

  1. Thil thleng thei hlawm lian pathum chiah a awm tih i pawm ka ring a, expiry-ah stock man chu kan strike price i thlan 1120 aiin a sang thei a, a hniam thei bawk a, a nih loh vek pawhin strike price-ah chiah chiah a expire thei bawk.

  2. Thil thleng thei 1-naa ka tarlanah khian 1150 ka hmang a, chu chu kan strike price 1120 aia sang a ni. A nih leh strike price dang 1140 emaw 1160-te hi? Profit leh Loss a awm theih dan turah khaikhawm vek theih an ni em ni?

  3. Thil thleng thei 2-naa ka tarlanah khian 1060 ka hmang a, chu chu kan strike price 1120 aia hniam a ni. A nih leh strike price dang 1080 emaw 1100-te hi? Profit leh Loss a awm theih dan turah khaikhawm vek theih an ni em ni?

Expiry 29th September 2026 a thlen hunah spot price hrang hrang eng emaw berah a expire thei tih han hre ta ila. Spot price-a expire dan a zir chuan Profit leh Loss awm dan pawh awlsam zawkin a khaikhawm theih bawk a ni.

Chumi hrethiam tur chuan tawitein - Expiry-a thlena option Intrinsic Value hi sawi ta ila.

Expiry-a thlena option Intrinsic Value (IV) hi zero (bial) aia hniam thei lo number, call option leitu in a thuneihna a hmana (right exercise) hlawkna a hmuh zat tur a ni. Heti pawh hian a sawi theih awm e: call option leitu i ni a, expiry a thlen huna i call option lei aṭanga hlawkna i hmuh zat tur pawh kan ti thei. A chhut chhuah dan chu hetiang hian a ni -

IV = Spot Price - Strike Price

Infosys spot price chu expiry ni ah 1160-ah a awm chuan, 1120 Call option i lei intrinsic value tur chu -

= 1160 - 1120

= 40

Chutiang bawkin Infosys spot price chu expiry ni ah 1000-ah a awm chuan, 1120 call option i lei intrinsic value tur chu -

= 1000 - 1120

= -20

MAHSE, Intrinsic Value chu zero aia hniam thei lo number (call emaw put emaw pawh nise) kan ti tawh a, chuvang chuan 1000-ah a expire-a, a IV tur chu

= 0 a ni ang.

Tikhan Intrinsic Value awmzia chu vawng tlat ta ila. Hemi hmang hian Infosys spot price expire dan a zira call option leitu profit leh loss awm theih dan kan en ho dawn a ni.

Call option leitu Profit & Loss

Infosys 1120 Call option leitu chu ka lo ni ta a, expiry a thlen huna spot price awmna a zira profit leh loss ka neih theih dan tur chu i en ho ang. Call option lei nan ₹37.40 premium ka chawi tih kha chhinchhiah bawk ila. He premium ka chawi hi, expiry ni a 1120 mana Infosys ka lei theihna tura thuneihna min petu a ni tih hriat a ṭha tel ang. P&L table chu hetiang hian a lo awm ang -

Negative sign (minus) hian ka hnen aṭang sum a chhuak tih a entir

Sl No. Spot Price expire-na Premium pek zat Intrinsic Value (IV) P&L (IV + Premium)
01 1000 (-) 37.40 1000 - 1120 = 0 = 0 + (-37.40) = -37.40
02 1020 (-) 37.40 1020 - 1120 = 0 = 0 + (-37.40) = -37.40
03 1040 (-) 37.40 1040 - 1120 = 0 = 0 + (-37.40) = -37.40
04 1060 (-) 37.40 1060 - 1120 = 0 = 0 + (-37.40) = -37.40
05 1080 (-) 37.40 1080 - 1120 = 0 = 0 + (-37.40) = -37.40
06 1100 (-) 37.40 1100 - 1120 = 0 = 0 + (-37.40) = -37.40
07 1110 (-) 37.40 1110 - 1120 = 0 = 0 + (-37.40) = -37.40
08 1120 (-) 37.40 1120 - 1120 = 0 = 0 + (-37.40) = -37.40
09 1140 (-) 37.40 1140 - 1120 = 20 = 20 + (-37.40) = -17.40
10 1160 (-) 37.40 1160 - 1120 = 40 = 40 + (-37.40) = +2.6
11 1180 (-) 37.40 1180 - 1120 = 60 = 60 + (-37.40) = +22.6
12 1200 (-) 37.40 1200 - 1120 = 80 = 80 + (-37.40) = +42.6
13 1220 (-) 37.40 1220 - 1120 = 100 = 100 + (-37.40) = +62.6
14 1240 (-) 37.40 1240 - 1120 = 120 = 120 + (-37.40) = +82.6

A chunga table hian thil pahnih chiang takin min hrilh -

  1. Infosys stock man hi 1120 aia tlawmah tla vang vang pawh nise, ka loss hnem theih ber chu -₹37.40 a ni.

    1. Zirchhuah 1-na: Spot price chu strike price aia a hniamin call option leituin sum a Loss ang. Amaherawh chu, premium a pek zat aia tam a loss thei lo thung.

  2. Infosys spot price hian 1120 strike price aia sanga a chhoh hian nasa takin Profit a pung chho tih a lang bawk.

    1. Zirchhuah 2-na: Call option lei chu kan strike price aia spot price a san chhoh in a hlawk. Strike price aia spot price a san poh leh hlawkna pawh a tam ang.

Spot price awmna a zira Profit & Loss a awm theih dan chhut chhuah dan chu -

P&L = Max[0, (Spot Price - Strike Price)] - Premium

A chunga formula hmang hian, expiry-a heng spot price awmna a zira call option leitu tana profit leh loss a awm theih dan i han chhut chhin lawk ang -

  1. 1009

  2. 1186

  3. 1156

Hetiang hian chhut tur a ni -

@1009

= Max [0, (1009-1120)] - 37.40

= Max [0, (-111)] - 37.40

= 0 - 37.40

= - 37.40

A chhanna hi a chunga kan zirchhuah pa 1-na ang khian - premium kan pek zat aia tam kan chan thei lo tih a lang.

@1186

= Max [0,(1186 - 1120)] - 37.40

= Max [0, (+66)] - 37.40

= 66 - 37.40

= +28.6

He chhanna hian a chunga kan zirchhuah pa 2-na (call option lei chu kan strike price thlan aia a spot price a san chhohin a hlawk) a rawn nemnghet leh bawk.

@1156

= Max [0,(1156 - 1120)] - 37.40

= Max [0, (+36)] - 37.40

= 36 - 37.40

= -1.40

He chhanna hian kan zirchhuah pa 2-na zawm ve awm tak si, loss pein a khawsa ta tlat mai. Eng nge a chhan ni thei ang? Spot price hi kan strike price thlan chungah awm mah se loss in kan la awm tho! Chu mai ni lovin heta kan loss -₹1.40 hi kan loss hnem theih ber -₹37.40 aiin a tlem daih zawk bawk. Thil awm dan hrethiam leh zual turin a hnuaia table hmang hian han sawifiah dawn ila -

Sl No. Spot Price expire-na Premium pek zat Intrinsic Value (IV) P&L (IV + Premium)
01 1120 (-) 37.40 1120 - 1120 = 0 = 0 + (-37.40) = -37.40
02 1154 (-) 37.40 1154 - 1120 = 34 = 34 + (-37.40) = -3.40
03 1155 (-) 37.40 1155 - 1120 = 35 = 35 + (-37.40) = -2.40
04 1156 (-) 37.40 1156 - 1120 = 36 = 36 + (-37.40) = -1.40
05 1157 (-) 37.40 1157 - 1120 = 37 = 37 + (-37.40) = -0.40
06 1158 (-) 37.40 1158 - 1120 = 38 = 38 + (-37.40) = +1.40
07 1159 (-) 37.40 1159 - 1120 = 39 = 39 + (-37.40) = +2.40
08 1160 (-) 37.40 1160 - 1120 = 40 = 40 + (-37.40) = +3.40
09 1161 (-) 37.40 1161 - 1120 = 41 = 41 + (-37.40) = +4.40
10 1162 (-) 37.40 1162 - 1120 = 42 = 42 + (-37.40) = +5.40

A chunga kan hmuh ang hian option leitu (buyer) chuan spot price-in a strike price thlan a tluk thlengin maximum loss (-₹37.40) a la ṭhin dawn a. Spot price hian a strike price thlan a pelh chhoh chiah hian loss pawh a tlem tial tial a, spot price eng emaw berah hian profit si lo leh loss si lovin a awm thei bawk a, hei hi Breakeven Point kan ti ṭhin. 1158 chin aṭangin pung a rawn awm ṭan bawk.

Eng call option pawh lei la, heti hian i breakeven point chu i chhut thei ang -

B.E = Strike Price + Premium pek zat

Infosys stock entirnaah khian kan Break Even point tur chu -

= 1120 + 37.40

= 1157.40 a ni ang.

Breakeven point-a P&L awm dan tur i en leh chhin ang

= Max [0, (1157.40 - 1120)] - 6.35

= Max [0, (+6.35)] - 6.35

= +6.35 - 63.35

= 0

I hmuh ang hian, breakeven point-ah chuan sum ka siam lova, kan chan lo bawk a ni. Call option i lei a hlawkna i hmuh dawn chuan i strike price mai ni lovin breakeven point chungah spot price a awm chhoh a ngai tihna a nih chu.

Call option leitu Payoff

Call option leitu i niha hlawkna leh channa a awm theih dan tur chu i hrethiam tawh awm e. Han ennawn leh thuak ila -

  1. Call option leituin sum a chan tam theih ber chu option a lei nana a hman zat - premium man zat kha a ni. Spot price chu strike price hnuaia a awm chhung chuan call option leitu sum chu a kiam rih ang.

  2. Spot price chu strike price aia a san chhoh zel chuan call option leitu hian tiam chin awm lovin hlawkna a siam thei.

  3. Spot price chu strike price aia a san tawh chuan hlawkna a awm ṭan tawh tur chu a ni teuh mai mahse option leituin a premium pek zat kha a hmuh let phawt a ngai ṭhin.

  4. Call option buyer-in premium a pek zat a hmuh letna lai tak chu breakeven point kan ti ṭhin (call option-ah chuan strike price aia sang a ni ṭhin ang).

  5. Breakeven point aia sanga spot price a awm hunah call option leitu chuan hlawkna a hmu ṭan tak tak chauh ang.

Heng kan sawi zawng zawng hi chart hmanga entir theih vek a ni a. A hmingah Payoff Chart emaw, Payoff Graph kan ti ṭhin. Hetiang hian Infosys call option trade payoff graph chu a awm ang -

Infosys payoff chart

A chunga chart aṭanga kan hmuh theih leh kan lo sawi tawh nena a inzul zui zel chu -

  1. Strike price 1120 hnuaia spot price a awm phawt chuan ₹37.40/- aia tam call option leitu hian a chan thei lo.

  2. 1120 aṭanga 1157.40 (breakeven point) kan kai chhoh hian kan loss chu a tlem chho tial tial tih a lang bawk.

  3. 1157.40-ah hian profit kan nei lovang a, loss pawh kan nei lo ang.

  4. 1157.40 aia sangah spot price a awm chauhin profit kan nei ṭan ang. Chart-a P&L line awn dan zawng kan en chian chuan, spot price hian kan strike price thlan a kal pel chho zel a nih chuan namen lovin profit hi a pung thei tih a lang bawk a ni.

Kan sawi tawh hnu mah nise - call option leitu i nih chuan chan theih zat chiang tak 'limited loss' i nei ang a, i hlawkna zat erawh tiam chin awm lo 'unlimited profit' a ni thung ang. Zirlai tharah call option zuartu/hralhtu (seller) thlirna tlang aṭangin kan zir ve leh thung ang.

He zirlai aṭanga kan zirchhuah pawimawh te

  1. Underlying/spot price a sang chho dawna i hriat chauhin call option leiin awmzia a nei ang.

  2. Underlying/spot price chu a awm hmun aṭang a che sawn lo emaw a khamphei zawngin a che a nih chuan call option leitu chuan sum a hloh ang.

  3. Call option leituina sum a chan hnem theih ber zat chu option hralhtu/zuartu hnena Premium (intiamkamna man) anga a pek zat kha a ni.

  4. Call option Intrinsic Value (IV) chu bial aia hniam thei lo number (non-negative number) a ni.

  5. IV = Max[0, (Spot Price - Strike Price)]

  6. Strike price hnuaia spot price a awm chhung chu call option leitu hian a sumlu a chan rih ang.

  7. Spot price hi strike price aia a sang chho zel a nih chuan call option leitu hian tiam chin awm lovin hlawkna a siam thei.

  8. Strike price chunga spot price a awm hian call option leitu hian hlawkna hmu tur a ni premium a pek zat a hmuh let tawh chuan.

  9. Call option leituin premium a pek chhuah zat a hmuh letna lai tak hi Breakeven Point kan ti.

  10. Breakeven point aia sangah spot price a awm tawh chuan call option leitu chuan hlawkna a hmu ṭan chiah ang.

Options trading hi i tui ve a nih chuan kan partner Zerodha hmang hian i lo trade ve dawn nia (Vawi khat Order-ah ₹20 chauh i chawi ṭhin ang)

Zerodha Investment account hawng ve rawh le.