Technical Analysis Kamkeuna

Stock Market A Aw B ah khan stock market awmzia, a kalphung leh a ṭobulte kan zir a, kan stock market zir tan tîr kawngah min lo pui hle tawh a. Chuta kan zir chhuah pawimawh tak pakhat chu, stock market-a hlawhtlinna leh hlawkna hmu tur chuan, ngun taka thil awmzia kan zir chian hmasak a tul tih hi a ni awm e. Chu kan zir chianna chuan tum felfai tak piah lamah hengte hi a keng tel tur a ni:

Stock kan lei leh hralh hun tur
Risk thleng thei zir chianna
Hlawkna awm thei zir chianna
Kan peipun hun chhung (holding period)

Technical Analysis (TA) chu khîng kan sawi tâkte tihlawhtling thei tura hmanraw pawimawh tak a ni. TA chuan stock emaw, index emawah ngaih dan mumal leh thlirna felfai tak kan neih theih nan min pui thei a, chu mai bakah kan lei hun, hralh hun tur, risk kan lak zat leh lak ngam dan thlengin thuthlukna min siampui dawn a ni.

Stock market kal dan leh awm dan tur zir chianna hmanraw dang ang bawkin Technical Analysis zir pawh hi a harna chin a awm ve tho va; amaherawhchu, khawl thil lama thiamna a lo sân tâkah chuan zir a awlsamin TA hmanga trading leh investment kalpui chu a lo hahdam ta phian a ni. Chungte chu kan la zir chho zel ang.

Technical Analysis hi eng nge a nih?

Tehkhin thuin ram dangah i zin a, chu i zinna ramah chuan ṭawng, ei leh in, hnam zia leh khawchin thlengin a danglam tih i hmu a, i tan chuan thil thar vek a ni. Zin veivakte tih ṭhin ang thovin a ni khatnaah chuan hmun thenkhatte chu i fang kual ve a, tlai lam a lo nih chuan i ril a lo tam ta a. Zanriah tui tak eiin a ni khatna chu vui liam i duh a. I bul hnaia mite hnenah chuan restaurant ṭha leh eitur tuina hmunte i zawt a, anni chuan chuta tanga hla vak lovah chuan kawtthler pakhat, eitur tui tak tak an zawrhna hmun chu an lo kawhhmuh che a. Va kala, va ei ve chhin chu i tum ta a.

Kawtthlera inpho chhuak chu a za tel teh meuh an lo ni a, ei tur chi hrang hrang thlan sen loh nen, engkim chu a tui hmel vek mai a ni. Zanriah atana rin tur ber chu i thlang thiam ta hauh lo va, chuta karah han zawt chiang leh zual turin an ṭawng i thiam lo bawk a. Hetiang dinhmun a nih tak siah chuan, i ei tur leh eina hmun tur chu engtin nge i thlan ang?

I ei tur leh eina hmun tur chu thlan dan kawng hnih i nei a ni.

Kawng 1-na: Dawr inpho chhuakte zinga pakhat chu i va pan ang a, an thil siam i en kual ang. Eitur siam nana an bawlhlo hmante i zawt ang a, an eitur siam dan i zawt bawk ang. Tin, an ei siamte chu tui i tih leh tih loh hriat nan i tem bawk ang. Hetiang hian inpho chhuak tam takte hnenah chuan i tikual thei a. I duh tak i hmuh hma chu i tem kual thei a ni.

Hetianga i tih kual den den hian i thil eite i chîk bik avangin i hre chiang hle dawn a ni. Nimahsela, inpho chhuak 100 chuang an awm a, an thil siam tem chhuak vek tur chuan i hun neihin a daih lo. A lo berah dawr 4 emaw, 5 emaw ei siam i tem hman ṭâwk ang. Dawr 100 chuang inpho chhuak zinga ei tur tui ber i ei lohna chance a awm ta a nih chu!

Kawng 2-na: Kil khatah dingin ei tur zuara inpho chhuakte chu ngun takin i thlir a. A inpho chhuak zingah chuan mipuiina an bawr deuh bik i zawng ang. Dawr lûn deuh i hmuh chuan, 'E! Hei chu miin an bawr nasa em mai, an thil siam a tui a ni ngei ang' i ti thei dawn a ni. Chu thlirna hmang chuan dawr tam tak inpho chhuak zinga miin an bawr nasat berna hmunah chuan ei ve mai ṭhain i hre ta a. Dawr tam tak kara ei siam tuina bera i chawlhna chance chu a sang ta hle a ni.

Kawng 2-na hi kan sawi hmasak zawk aia a ṭhatna lai chu thil tam tak zir chian tur a awmin a hman theih a, thuthlukna siam a tiawlsam ṭhin. Amaherawhchu, a ṭhat lohna lai ve thung chu mipuiin bawr huk mah sela, mipui hi an dik lo ve thei tho lai hi a ni awm e.

Stock market khawvelah chuan kan sawi kawng 1-na khian Fundamental Analysis kan tih a ang hle a, fundamental analysis-ah chuan company chhiar tham lek chu uluk takin i zir chiang ṭhin a ni. Zirlai dangah fundamental analysis hi kan la zir chhunzawm ang.

Kawng 2-na kan sawi ve thung khi chuan Technical Analysis a entir a, mipui tam zawk rilru put hmang azirin miin thuthlukna a siam ṭhin a ni.

Technical Analysis hi market emaw, stock emaw chet dan tur zir chianna hmanrua a ni a. Market-a telte (participants) chet dan zir chiangin chu chuan trade-na tur hun ṭha zawn chhuah lamah a pui ṭhin a ni. Market-a telte chet dan chu chart hmanga en leh zir chian ṭhin a ni a. Hun a kal zel a, chart-ah chuan thil awm nawn fo (pattern) a lo awm ṭhin a. Chung pattern chuan market kal leh zel dan turte a hril ṭhin a; amaherawhchu, a lan dan ang aiin a awlai lo tih erawh hriat a ṭha ang. Technical Analyst (technical analysis hmangtu) hna chu market-a pattern insiamte lo en fiaha, zir chianga, a kal leh zel dan tura thlirna lo siam a ni.

Thil zir chianna hmanraw dangte ang bawkin technical analysis hian innghahna hrang hrang a nei ve a. Technical Analysis hmangtu i nih chuan chung innghahnate chu hre reng chungin market-ah i trade thin tur a ni. Kan zir thui zel ang a, chung innghahnate chu kan la hrethiam chho zel ang.

Fundamental Analysis leh Technical Analysis hian khaikhin a hlawhin, tam tak hian a ṭha zawk an zawng nasa ṭhin hle a; amaherawhchu, an pahnihah hian a ṭha zawk emaw, a dik zawk emaw tih tur a awm chuang lo tih hriat a ṭha. Heng market zir chianna hmanruate hian ṭhatna lai leh ṭhat lohna lai an nei ve ve a ni. An kalphung leh tih dan hi a inang lovin a inpersan hle a. Trader ṭha chuan trade-na hun ṭha emaw, invest-na tur stock ṭha emaw a thlang dawn a nih chuan FA leh TA hi a thiam ve ve tura ngaih a ni.

Beiseina siam thiam a ṭha

Trading leh investment lama tui tharte hian technical analysis zir hi rang taka hlawkna siam theitu emaw an ti fo ṭhin a, mahse a ni hauh lo thung. I hman thiam dan azirin hlawkna têl tur chu a awm teh meuh mai; amaherawhchu, ei zawn nana hmang thei tur leh mumal taka hlawkna lo lut reng thei tur chuan a tih dan hi ngunthluk taka zir a tul a, hun pawh a duh rei ve ṭhin a ni.

Technical Analysis hi hlawk thuaina tur hmanrua anga i thlir chuan tlak chhiat rup theihna a ni tih hriat reng tur a ni. Hlohna lian tham tak a thlen chang hian trader chuan technical analysis a hman thiam tawk loh lam ai mahin a hmanrua ‘Technical Analysis’ dik tawk loh vangah a puh fo va. Chuvangin, technical analysis zir tur i nih chuan he hmanruain a thlenpui theih chin che ah beiseina siam thiam a tul a, rilru mumal leh fim taka luh chilh tur a ni. Heng point-te hi lo thlir thuak thuak ila.

Trade – Technical Analysis hi hun rei lutuk lo chhunga trade lak nan hman tur a ni deuh ber.** Hun rei deuh tak thlira sum peipun tum tan chuan hman loh tur a ni. Hun rei tak kawl atana i duhte chu fundamental analysis hmanga thlan a fuh zawk. Tin, fundamental analyst i nih chuan, luh hun leh chhuah hun tur chian nan technical analysis hman a fuh ṭhin bawk.
Hlawkna - Technical Analysis hmanga trade i lak chuan hun rei vak lo chhung chauh i kawl dawn avangin hlawkna tam tak beisei ngawt tur a ni lo ang.** Hlawkna sang tak, entir nan, 100% te, 200% te hlep chhuak thei tur chuan hun a mamawh ṭhin a. TA hmanga i trade chuan hun reilote chhung chauh i kawl dawn avangin hlawkna sang tak i hmu ngawt dawn lo tih hriat a ṭha ang.
Holding period - TA hmanga trade lak chu a rei lo tlangpui kan tih tawh kha. A rei pawlah kar hnih thum te a ni ve a, a rei lo berah second emaw, minute a ni ang.
Risk - Trade hi chhan neia lak a ni ṭhin a; amaherawhchu, eng emaw vangin stock man hian rang taka tlâk phut chang a nei ṭhin. Hetiang hunah hian trader tam takten a chhoh leh mai beiseiin hralh mai lova kawl an ching hle. TA hmanga trade lak reng reng chu rei lo tura ngaih a ni kan tih tawh ang khan; i duh loh dana trade a kal a nih chuan loss tlem zawka chhuaha, trade tur dang zawn leh mai hi a finthlak a ni.

He zirlai aṭanga kan zirchhuahte

Market kal dan leh a kal zel dan tur thlirna kan neih theih nan Technical Analysis hi a ṭangkai hle. Chu mai bakah, TA hian stock kan lei hun leh hralh hun tur zawnna kawngah min pui bawk.
Technical Analysis hian market a telte chet dan chu stock chart hmangin a tar lang ṭhin.
Thil thleng nawn fo, pattern kan tih chu chart-ah chuan a insiam ṭhin a, heng pattern-te hian trade lakna hun ṭha trader-te a hrilh ṭhin.
Technical Analysis thawh ṭhat dan ber chu a tih theih leh theih loha chian phawt hian a ni.
Hun rei vak lo kawl tura stock lei leh hralh kawngah Technical analysis hi a ṭangkai hle a ni.