Stock Market-a sum siam theih dan te
Stock market hian India ram economy-ah hmun pawimawh tak a luah tih hi hai rual a ni lo. A pawimawh dan la hre thuk lutuk lo tan tihian han sawi ta mai ila, company-ten mipui hmaa share an zawrh (IPO kan tih) hian an sumdawnna mamawh sumlu tam tak a phuhruk sak thin a, company ten tha taka sumdawnna an kalpui theih chuan, sorkar hnenah chhiah a lut tha a, chu chhiah chu mipuite tan hman let leh thin a ni.
Stock market chu a mamawhten sumlu an zawnna hmun leh sumlu chuangliam neiten an peipunna hmun a ni a. Mamawh leh chuangbang peipun tur neite inhmuhkhawmna a ni ber. Vantlang mipui piah lamah sorkar pawhin tangkai takin a hmang a, National Pension Scheme (NPS) kan tih pawh hi stock market nena inzawm tlat a ni tih hrelo pawh kan la awm maithei. Chutiang khawpa tangkai leh pawimawh chu nang leh kei banphakah a awm reng si a, engtinnge kan lo hman tangkai ve theih ang a, engtinnge kan sum neih chuangliam hna kan thawhtir theih ang tih kan zir ho dawn a ni.
Kan thupui hi kan en chuan 'stock market-a sum siam theih dan te' tih a ni a. Stock market bulthut leh a tobul sawi em em ka tum lo va, a kalphung tlangpui i hriat duh chuan he zirlai hi i lo chhiar deuh rih phawt dawn nia. Stock market-a sum kan siam theih dan te chu i sawi zau ang le.
Company share man hlu chho zel atangin
Stock market chu company-ten share an zawrh chhuahna hmun kan tih tawh kha. Kan inchhung khur hi han chik deuh ta ila, inbual nan eng nge kan hman a, ha nawhnan eng nge kan hman a, midang mobile phone hmanga biaknan eng sim card nge kan hman tihte hi han chhui chiang deuh ta ila company hming lar deuh deuh i ngaihtuahnaah a rawn luh nghal mai ka ring. Chungte chu Hindustan Unilever siam Dove sahbawn te, Colgate-te leh Bharti Airtel-te an ni awm e.
Heng company-te hian neitu nihna emaw, share kan tih mai chu an zuar chhuak ṭhin a, tupawhin kan lo lei ve thei reng a ni. Tehkhin thuin, Airtel simcard hi ram pumah kan hman nasat em avangin midang biak ngai kan awm chhung chu Airtel simcard hi kan hman reng ka lo ring ta a, Airtel sumdawnna chu a tha tawk hle ka tihna pawh a ni thei ang. Tichuan, Airtel sumdawnnaah chuan neitu nihna neih ve ka duh hle a, a neitu zinga tel ve theih ka duh takzet a. Neitu nihna ka va neih ve theih dan chu hetiang hian a ni, Airtel chuan NSE leh BSE-ah an share te lei theihin an dah a, SEBI (Securities Exchange Board of India) hnuaia inziak lut broker, entir nan, Zerodha-ah, demat account ka siam ang a, tichuan Airtel-ah chuan neitu nihna, shares kan tih chu ka lei dawn a ni. Airtel chuan inbiak pawhna lamah hmasawnna thar an rawn chhawpchhuah zel avangin, investor a hip ta zela an share hlutna man pawh a lo sang chho ve ta zel a. Ka leina man atanga a san chhoh hnuah chuan man sang leh to zawkah ka duh chuan ka hralh thei a, a nih loh vek pawhin, hun rei zawk pawh ka kawl zel thei a ni. Hei hi sum kan siam theih dan pakhat chu a lo ni ta a, company share man hlu chho zel atangin sum kan siam theiin, kan peipung thei ta phawt a ni. Airtel share man a hlut chhoh zel dan hi han enchiang ta ila.
Airtel hi mipui vantlang hnena neitu nihna an zawrh chhuah kum hi 2003 daih tawh kha a ni a, an inpho chhuah ni atangin 17,298.25% hlawkna pe tawhin, mawlmang taka chhut chuan Airtel hian kum tin 752.10% hlawkna a pe ang a ni. Amaherawh chu, hei hi hun kal tawha pung a lo pek dan a ni a, hmalam huna pung a pek dan tur a ni lo tih leh pung lo awm tur hi tiam theih a ni lo tih erawh i hriat a pawimawh hle thung.
Company Dividend atangin
Stock market-a kan sumlu a lo ṭhan theih dan chu kan hrethiam tawhin ka ring a, tunah chuan kan peipunna mek emaw, neitu kan nih mekna company atanga sum lo luh theih dan kan sawi ve leh thung ang. Company-te hian an sumdawnna aṭanga hlawkna an hmuh thenkhat chu an mahnia peipung tute emaw an investors-te hnenah an pe let veleh thin a, hei hi dividend kan ti thin a ni. A chunga entir na kan pek Airtel khi han hmang chhunzawm ta ila. Airtel chuan kum 2009 atang khan hetiang hian Dividends chu a lo sem chhuak tawh a -
| Announcement Date | Ex-Date | Record Date | Type | Dividend / Share |
|---|---|---|---|---|
| 13/05/2026 | 24/07/2026 | 24/07/2026 | Final | ₹24.00 |
| 13/05/2025 | 18/07/2025 | 18/07/2025 | Final | ₹16.00 |
| 14/05/2024 | 07/08/2024 | 07/08/2024 | Final | ₹8.00 |
| 16/05/2023 | 11/08/2023 | 11/08/2023 | Final | ₹4.00 |
| 17/05/2022 | 01/08/2022 | 02/08/2022 | Final | ₹3.00 |
| 18/05/2020 | 06/08/2020 | 07/08/2020 | Final | ₹2.00 |
| 25/10/2018 | 05/11/2018 | 06/11/2018 | Interim | ₹2.50 |
| 24/04/2018 | 02/08/2018 | 04/08/2018 | Final | ₹2.50 |
| 18/01/2018 | 30/01/2018 | 31/01/2018 | Interim | ₹2.84 |
| 09/05/2017 | 13/07/2017 | 15/07/2017 | Final | ₹1.00 |
| 27/04/2016 | 11/08/2016 | 13/08/2016 | Final | ₹1.36 |
| 28/04/2015 | 13/08/2015 | 15/08/2015 | Final | ₹2.22 |
| 13/08/2014 | 21/08/2014 | 23/08/2014 | Interim | ₹1.63 |
| 29/04/2014 | 21/08/2014 | 23/08/2014 | Final | ₹1.80 |
| 02/05/2013 | 23/05/2013 | 25/05/2013 | Final | ₹1.00 |
| 02/05/2012 | 16/08/2012 | 18/08/2012 | Final | ₹1.00 |
| 05/05/2011 | 17/08/2011 | 20/08/2011 | Final | ₹1.00 |
| 28/04/2010 | 18/08/2010 | 21/08/2010 | Final | ₹1.00 |
| 29/04/2009 | 24/07/2009 | 31/07/2009 | Final | ₹2.00 |
Dividend an sem hnuhnung ber atanga a lan danah chuan ₹1,00,000 investment lo nei ta la, share pakhat i leina man ₹1905 a lo nih bawk chuan share 52 i kawl dawn tihna a lo ni a. Dividend i dawn zat tur chu -
₹24 (dividend per share) * 52 (i share kawl zat) = ₹1,248
a lo ni dawn tihna a ni. Airtel company-a i peipun avanga i sumlu a ṭhan piah lamah, peipungtu zinga i tel avangin i sumlu hman zat atanga 1.248% chu dividend in i dawng tel dawn bawk tihna a ni.
Khaikhawmna
Stock market-a sum kan siam theih dan emaw kan sumlu alo than theih dan chihnih a awm, chungte chu -
-
Kan peipunna company a lo ṭhan a, a share mante a lo ṭhanin.
-
Kan peipunna company-ten Dividend an semin.
Stock market-a sum peipun hian risk a keng a, pung awmzat tur leh thil thleng thei tiam theih leh sawi lawk theih a ni ngai lo. A kalphung hrethiam hmasa phawt ang che.